Pakistan Saudi Arabia ke difa ke liye kisi bhi hadd tak jayega: DG ISPR

DG ISPR Lieutenant General Ahmed Sharif Chaudhry ne Arab News ko interview mein kaha Pakistan Saudi Arabia ke sath sifarti aur amali taur par mukammal khara hai aur is ka azm Makkah Mukarramah aur Madinah Munawwarah samet donon muqaddas tareen maqamat ke tahaffuz tak phaila hua hai.

Lieutenant General Ahmed Sharif ne kaha ke hum kisi bhi hadd tak jayenge aur Saudi Arabia ko kisi bhi jarehiyat ke khilaf difa faraham karte rahenge, Saudi salamati ke liye Pakistan ka azm ghair mashroot hai aur donon mumalik ke awam, afwaj aur qiyadat ke darmiyan tareekhi talluqat is ki bunyad hain.

Unhon ne mazeed kaha ke Pakistan Saudi qiyadat se musalsal rabte mein hai aur khitte ki hukumaton se mushawarat ke zariye muzakirat aur pur-aman hal ki koshish kar raha hai.

Unhon ne Islamabad mufahimati yaddasht ko maujooda pecheeda fauji soorat-e-haal se nikalne ke liye wahid haqiqi rasta qarar dete hue kaha Pakistan Washington aur Tehran ko dobara muzakirat ki mez par lane ke liye mushtarka bunyad talash kar raha hai.