Petroleum levy ke khatme par Shehbaz Sharif aur Hafiz Naeem ki mulaqat do roz mein mutawaqqe

Lahore: Jamaat-e-Islami ke naib ameer Liaquat Baloch ne kaha hai ke wazir-e-azam Shehbaz Sharif aur ameer Jamaat-e-Islami Hafiz Naeem ur Rehman ke darmiyan aainda do roz mein mulaqat mutawaqqe hai, jis mein petroleum levy ke khatme ka muamla zer-e-behas aaye ga.

Liaquat Baloch ke mutabiq federal minister Ahsan Iqbal aur wazir-e-azam ke moawin-e-khusoosi Rana Sanaullah Khan ne un se telephonic rabta karke mujawwaza mulaqat ke bare mein aagah kiya hai.

Unhon ne bataya ke petroleum levy ke muamle par hukumati committee ke arkaan ne wazir-e-azam Shehbaz Sharif ko Jamaat-e-Islami aur hukumati committees ke darmiyan Islamabad aur Lahore mein hone wale muzakrat se aagah kar diya hai.

Liaquat Baloch ne kaha ke ameer Jamaat-e-Islami wazir-e-azam se petroleum levy ke khatme ke agenda par mulaqat karenge. Unhon ne wazeh kiya ke Jamaat-e-Islami petroleum levy ka mukammal khatma chahti hai.

Jamaat-e-Islami ne levy ke khatme ke khilaf ehtejaji tehreek ke teesre marhale ka aaghaz kar diya hai. Hukumat ne awam ko relief na diya to Islamabad ki janib long march hoga.