Gandum ki barhti qeematon par Ishaq Dar ki zer-e-sadarat cabinet committee ka ijlas

Islamabad: Naib wazir-e-azam o wazir-e-kharija Senator Muhammad Ishaq Dar ne gandum ki qeematon mein izafe ke rujhan par tashweesh ka izhar kiya hai.

Un ki zer-e-sadarat zaroori ashya-e-khurdonosh ki farahmi, mulki zakhair aur qeematon par control ke hawale se cabinet committee ka aala satah ijlas hua, jis mein rozmarra istemal ki bunyadi ashya ki dastiyabi, qaumi zakhair, kharidari ke nizam, maqami khapat aur qeematon ke rujhanat ka tafseeli jaiza liya gaya.

Zakhair aur cheeni ki surat-e-haal

Ijlas ko briefing mein bataya gaya ke rozmarra istemal ki zaroori ashya ke mulki zakhair tasalli bakhsh hain aur maujooda zakhair maqami market mein farahmi ka tasalsul barqarar rakhne mein madad de rahe hain. Mulki zakhair aur daramadi gandum agli fasal ki aamad tak zaruriyat poori karne ke liye kafi hain.

Ijlas ko cheeni ki market surat-e-haal se aagah kiya gaya ke maqami market mein cheeni ki qeemat 155 rupay per kilogram ki muqarrara perchoon qeemat se namayan taur par kam hai. Hukkam ke mutabiq aainda crushing season tak cheeni ke matlooba istemal se zaid zakhair maujood hain, jis se maqami zaruriyat poori karne mein madad milne ki tawaqqo hai.

Mutaliqa idaron ko hidayat

Naib wazir-e-azam ne gandum ki qeematon mein izafe par tashweesh ka izhar karte hue mutaliqa hukkam ko hidayat ki ke qeematon mein istehkam yaqeeni banane ke liye gandum ki farahmi barhane samet tamam zaroori iqdamat kiye jayen. Unhon ne zaroori ashya ki dastiyabi aur qeematon ki surat-e-haal ki musalsal nigrani par zor diya taake sarifeen ko ghair zaroori Mehngai se mehfooz rakha ja sake.

Unhon ne kaha ke ghizai tahaffuz ko yaqeeni banana aur zaroori ashya munasib qeematon par awam ko farahim karna hukumat ki tarjihat mein shamil hai. Marketon mein ashya ki khareed o farokht ke nizam par kari nazar rakhne aur qeematon mein ghair zaroori izafe ki roktham ke liye mouassir iqdamat ki hidayat bhi ki gayi.

Zakhira andozi aur market mein qayas araiyon ke khilaf zero tolerance ki policy apnane ki hidayat ki gayi, aur tamam mutaliqa idare bahami rabte ke zariye ashya-e-zaroriya ki bila taatul farahmi yaqeeni banane ke liye apna kirdar ada karenge.

Ijlas mein zaroori ashya-e-khurdonosh ke zakhair, talab o rasad aur qeematon ki surat-e-haal ki musalsal nigrani jari rakhne ka azm dohraya gaya.