OIC Secretary General ki Makkah, Madinah aur Saudi shehron par Houthi hamlon ki mazammat

Jeddah: Islami Taawun Tanzeem (OIC) ke Secretary General Ismail bin Sheikh Ahmed ne Makkah Mukarramah, Madinah Munawwarah, Taif, Jeddah aur deegar maqamat par Houthiyon ke mubayyana hamlon ki shadeed mazammat ki hai. Unhon ne in hamlon ko naqabil-e-qabool qarar diya.

Unhon ne Islami muqaddas maqamat ki be-hurmati ki bhi mazammat ki aur Saudi Arabia ke sath mukammal yakjehti ka izhar kiya hai.

OIC ke aelamiye ke mutabiq Secretary General ne kaha ke maidan-e-Arafat ke qareeb Wadi Mughmas ko nishana banana is amr ki akkasi karta hai ke Houthi anasir muqaddas maqamat ke ehtaram aur aam shehriyon ke tahaffuz ko ahmiyat nahin de rahe.

Ismail bin Sheikh Ahmed ne kaha ke Islami muqaddas maqamat par hamle poori Muslim ummah ke jazbat par hamla hain. Muslim duniya ko is surat-e-haal mein mazboot aur zimmedarana mauqif ikhtiyar karna hoga taake shiddat pasand anasir ki karrawaiyon ka khatma kiya ja sake.

Unhon ne aalmi biradari par zor diya ke Islami muqaddas maqamat par hamlon ke khilaf fori iqdamat kiye jayen aur in karrawaiyon ke zimmedaron ka ehtesab yaqeeni banaya jaye.

Secretary General ne mamlikat ki salamti, khudmukhtari aur aqalimi salmiyat ke tahaffuz ke liye kiye jane wale iqdamat ki mukammal himayat ka yaqeen dilaya. Aelamiye mein is azm ka aeada kiya gaya ke muqaddas maqamat ke ehtaram, shehriyon ke tahaffuz aur khitte mein aman o istehkam ke liye muassir iqdamat nagzeer hain.