Iraq mein Irani Kurd group ke thikane par drone hamla, America ka shehriyon ko safar se gurez ka intibah

Tehran: Iran ki musalah afwaj ne Iraqi Kurdistan mein Irani Kurd opposition group ke thikanon par drone hamla kiya. Arab TV ke mutabiq Balisan ke ilaqe mein guzishta raat dehshat gard aur alehdagi pasand group Komala ke headquarter ko nishana banaya gaya, jo Pasdaran-e-Inqilab ki zameeni afwaj ke ek drone operation ka hissa tha.

Is neem khud mukhtar khitte mein Irani Kurd askariyat pasandon ke kai giroohon ke camp aur thikane mawjood hain, jinhen Iran February mein Mashriq-e-Wusta jang shuru hone ke baad se baraha nishana bana chuka hai. IRGC ne in hamlon ki fori zimmedari qubool nahin ki. Iran ka ilzam hai ke in giroohon ko is ke azli dushman Israel ki himayat hasil hai.

Is saal 17 July ko ek intihai muhlik hamle mein Sulaimaniyah shehr ke qareeb Komala group ke nau arkan halak ho gaye the.

Dusri janib American wizarat-e-kharija ne Iraq mein mumkina hamlon ka intibah dete hue aala tareen satah ki ehtiyati tadabir barqarar rakhne ki hidayat ki hai. Shehriyon ko kisi bhi maqsad ke liye Iraq ka safar na karne ka mashwara diya gaya hai. Yeh iqdam American shehriyon ki salamati yaqeeni banane mein Baghdad ki nakami ke natije mein uthaya gaya hai.

Wizarat-e-kharija ke bayan ke mutabiq tashaddud ya musalah tasadum ki surat mein Iraqi hukumat American shehriyon ki salamati ki zamanat nahin de sakti. Iraq mein kaam karne wale American sarkari mulazimin shadeed khatraat ke bais sakht security protocol ke tehat rehne aur kaam karne ke paband hain. Security surat-e-haal ki pesh raft ke mutabiq mulazimin ki surat-e-haal mein mazeed tabdiliyon ka imkan bhi zahir kiya gaya hai.

Wizarat ne yeh bhi wazeh kiya ke security khatraat ke bais American sarkari mulazimin ko Iraq ke safar ke liye khusoosi manzoori darkar hoti hai.