OpenAI ka insan numa robots tayyar karne ka mansooba, robot ka dimaagh banana bara challenge: Sam Altman

Washington: Artificial Intelligence ko amali duniya mein wus’at dene ke liye OpenAI ne insan numa robots ki tayyari ke shobe mein qadam rakhne ki tayyari shuru kar di hai. In robots ko rozmarra zindagi mein mukhtalif kaam anjam dene aur logon ki madad ke liye istemal kiya ja sakega.

Emirati khabar rasan idare ke mutabiq company ke chief executive Sam Altman ne kaha ke is silsile mein sab se bara challenge robot ka dimaagh tayyar karna hai taake woh haqiqi duniya ko samajhne, faisle karne aur kaam durust tareeqe se anjam dene ke qabil ho sake.

Unhon ne kaha ke insan numa design aise mahaul mein kaam karne ke liye mozoon hai jo insanon ke liye banaye gaye hain.

OpenAI ne tahal robot ke hatmi design ya in makhsoos kamon ki tafseelat zahir nahin kin jo yeh anjam dega.

Taham company Artificial Intelligence ke nizam aur harkat ko control karne wali technologies tayyar karne ke liye mahireen bharti kar rahi hai, jin ki madad se robots amali duniya ke sath taamul kar saken ge.

Company ka maqsad aise hama maqsad robots tayyar karna hai jo mukhtalif nauiyat ke kaam anjam de saken. Taweel muddati mansoobe mein aise zaati robots ki tayyari bhi shamil hai jo rozmarra zindagi mein logon ki madad kar saken.

Is maqsad ke husool ke liye aise nizam tayyar karna zaroori hoga jo apne ird gird ke mahaul ko samajhne aur ghair mutawaqqa soorat-e-haal mein mozassir aur mehfooz andaz mein rad-e-amal dene ki salahiyat rakhte hon.