Islamabad ko administrative unit banane ke liye hudood o quyood ke taayun par kaam shuru

Zaraye Wizarat-e-Mansooba Bandi ke mutabiq ibtidai taur par mojooda wafaqi darul hukumat ilaqa hi ko naye soobe ya administrative unit ki hudood qarar diye jane ka imkan hai, doosre marhale mein Islamabad se mulhiqa baaz ilaqon ko bhi naye soobe ya administrative unit mein shamil kiya ja sakta hai, taham is ke liye soobon ki mojooda hudood mein tabdeeli aur baqaida hadd bandi karna zaroori hogi.

Zaraye ka kehna hai ke soobai assemblies ki qarardad ke zariye manzoori ke baghair soobai ilaqon ko naye administrative unit mein shamil nahin kiya ja sakega, jabke naye unit ki hudood aur ikhtiyarat ka hatmi faisla aini o qanooni tareeqa kaar ke mutabiq hoga.

Dastavez ke mutabiq Islamabad ke intizami dhanche ke hawale se wafaq se ikhtiyarat maqami hukumat ko muntaqil karne ki sifarishat tayyar kar li gayi hain, jis ke tehat ikhtiyarat nichli satah tak muntaqil kiye jayenge aur Islamabad mein numainda hukumat qaim ki jayegi.

Planning Commission ki dastavez ke mutabiq Aman o Aman aur master planning ke muamlat naye administrative unit ke daira ikhtiyar mein shamil nahin honge, jabke Islamabad ke alag administrative unit banne ki soorat mein Aman o Aman aur master planning ke ikhtiyarat wafaqi hukumat ke paas barqarar rahein ge.