DG ISPR aaj shaam aham press conference karenge

Zaraye ke mutabiq DG ISPR Lieutenant General Ahmed Sharif Chaudhry ki press conference shaam 5 bajay hogi, jis mein aham umoor par briefing di jaye gi.

Qabl-e-azeen Lieutenant General Ahmed Sharif Chaudhry ne Fatima Jinnah Women University Rawalpindi ki talibaat aur faculty members ke saath khusoosi nashist ki.

Nashist ke dauran DG ISPR ne talibaat ke mukhtalif sawalaat ke muddallal aur mufassal jawabaat diye, barah-e-raast sawal o jawab ke zariye talibaat ko qaumi umoor se mutaliq haqaiq jaanne ka mauqa mila, jabke kai ibhamaat aur ghalat fehmiyon ko bhi door kiya gaya.

Is mauqe par Vice Chancellor Fatima Jinnah Women University Professor Dr Bushra Mirza ne kaha hai ke Taleem ka maqsad sirf nisabi maloomaat tak mehdood nahin balke talibaat ki tarbiyat aur unhein zamini haqaiq se aagah karna bhi zaroori hai.