Yemeni hukumat ka Taiz mein Houthiyon ke zere qabza ilaqay wapas lene ka daawa

Group ke jangju dakhil ho gaye the.

Fauj ka kehna hai ke is ki pesh qadmi mazeed naye ilaqon ki jaanib jari hai, Yemeni forces ne Houthiyon ke ijtimaat par fazai hamle kiye, jin ke nateeje mein mutaddid fauji gariyan tabah hueen, darmiyane darje ke aslahe ke golah barood ka zakhira phat gaya aur kam az kam 10 musallah afraad halak hue.

Yeh pesh raft aise waqt mein hui hai jab Riyadh ki himayat yafta Yemeni hukumat ne Houthiyon ke saath barhti hui jhadpon ke dauran Bahire Ahmar ke sahil par apni askari mojoodgi barhane ka ahd kiya hai.

Idhar Saudi civil defence ne mamlikat ke janubi hisse ke chaar shehron mein mumkina khatre ke pesh-e-nazar ibtidai intabah jari kiya, yeh intabah Najran, Khamis Mushait, Jazan aur Abha ke liye tha. Baad azan idare ne ‘khatra tal jane’ ki ittela dete hue intabahat wapas le liye.

Dusri jaanib aalmi mandi mein tel ki qeematon mein teen feesad se zyada izafa hua, kyunke ek aham Saudi tel pipeline ki bandish, Saudi Arabia par Houthiyon ke naye hamlon aur khaleej mein jahazon par Irani hamlon ne rasad se mutaliq khadshaat mein mazeed izafa kar diya hai.

Isi tanazur mein Houthiyon se wabasta zaraye ablagh ne khabar di ke Saudi Arabia ne shumali Yemen mein un ke markazi garh soobah Saada par hamle kiye hain.

Houthiyon ke TV channel Al Masirah ke mutabiq do fazai hamle Saada soobe par kiye gaye, jabke isi soobe ke sarhadi zila Munabbih par topkhane se golah bari bhi ki gayi.

Houthiyon ke fauji tarjuman Yahya Saree ne Social Media platform X par ek bayan mein kaha ke Saudi Arabia ne guzishta 24 ghanton ke dauran Taiz, Lahj, Al Jawf, Hajjah, Al Bayda aur Saada soobon par 58 fazai hamle kiye, jin mein Khamis Mushait ke fazai adde se udne wale F15 tayyare istemal kiye gaye.

Houthiyon ne yeh bhi elan kiya tha ke unhon ne drones aur missiles ke zariye janubi Saudi Arabia mein ek fauji adde ko nishana banaya hai, Saudi shehr Sharurah mein waqe adde par hamle ka hadaf ‘aslaha godam, command aur control rooms the.

Tarjuman ne kaha ke hamle mein barhi tadad mein ballistic missile aur drones istemal kiye gaye aur daawa kiya ke nishana durust aur barah raast tha, taham unhon ne hamle ke waqt ki wazahat nahin ki.

Yemeni hukumat ne bhi mukhtalif ilaqon mein Houthiyon ke thikanon par fazai hamle kar ke fauji saz o saman tabah karne aur Houthi jangjuon ko halak karne ka daawa kiya hai.