Lula chauthi baar Brazil ke sadr muntakhib, Flavio Bolsonaro ka shikast tasleem karne se inkar

Brasilia: Luiz Inacio Lula da Silva ne Brazil ke sadarati run-off intikhab mein kamyabi hasil kar ke chauthi muddat ke liye sadarat hasil kar li hai. Un ke harif Flavio Bolsonaro ne shikast tasleem karne se inkar kar diya hai.

Sau feesad votes ki ginti mukammal hone par Election Court ne bataya ke 80 salah Lula taqriban 44 lakh votes se aage rahe. Unhon ne 51.79 feesad vote hasil kiye, jabke senator aur 45 salah Bolsonaro ko 48.21 feesad vote mile.

Lula October ke awail mein pehle marhale mein Bolsonaro se mamooli farq se peechay rahe the. Guardian ke mutabiq 1980 ki dehai mein jamhooriyat ki wapsi ke baad se Brazil mein pehle marhale mein doosre number par rehne wala koi umeedwar doosre marhale mein kamyab nahin hua tha.

Sao Paulo mein khachakhach bhare hall mein hamiyon se khitab karte hue Lula ne kaha: “Yeh intikhab inkar pasandi ki shikast tha.” Unhon ne mazeed kaha: “Yeh jamhooriyat thi jis ne yeh mumkin banaya.”

Unhon ne yeh bhi kaha: “Yeh mulk kisi ka pichwara banna qabool nahin karega.” Unhon ne ahd kiya ke woh jins ya mazhab se qata nazar tamam Brazili shehriyon ka ehtaram karenge.

Lula mangal ko 81 baras ke ho jayenge. Woh 5 January 2027 ko apni chauthi ghair mutawatir muddat ka aghaz karenge.

Bolsonaro ne us waqt khitab kiya jab Lula apni fatah ki taqreer kar rahe the. Unhon ne kaha ke intikhabi nateeja tasleem karna “namumkin” hai aur un ki qanooni team intikhab ko kalamadam qarar dilwane ki koshish karegi.

Unhon ne Supreme Court ke judge Cristiano Zanin ke is faisle ka hawala diya jis ke tahet voting ka waqt do ghante barha kar sham 7 bajay tak kar diya gaya. Bolsonaro ne ise “ghair mamooli, naqabil-e-qabool” qarar diya. Un ke baqaul yeh “Khel jari hote hue Khel ke usool badalne” ke mutaradif tha.

Zanin ne voting khatam hone se teen minute qabl faisla sunaya. Tauseeh donon umeedwaron ki darkhwaston ke baad ki gayi. Guardian ke mutabiq Bolsonaro ki intikhabi muhim ne bhi Election Court se voting ke auqat barhane ki darkhwast ki thi. Baaz polling maqamat par sham ke waqt uljhan ki ittilaat samne aayin.

Voters ki shirkat Lula ke liye sazgar dikhai di. Pehle marhale mein vote na dalne ki sharah 21.08 feesad ke record satah par rahi, jis ke bare mein Guardian ka kehna hai ke is se Lula ke voters zyada mutasir hue kyunke woh umooman polling stations se zyada fasle par rehte hain. Run-off mein yeh sharah kam ho kar 19.21 feesad reh gayi.

Flavio Bolsonaro sabiq sadr Jair Bolsonaro ke bete hain jinhen 2022 mein Lula ke hathon shikast hui thi. Jair Bolsonaro ne bhi shikast tasleem karne se inkar kiya tha. Baad azan unhen baghawat ki koshish ke ilzam mein saza suna di gayi.

Lula ke wazir Sehat Alexandre Padilha ne nateeje ko “aik azeem fatah, sirf Brazil ke liye nahin” qarar diya. Unhon ne kaha ke yeh “baqi Latin America aur duniya ke liye aik aham ishara” hai.

Lula America ke sadr Donald Trump ke sakht naqid hain. Associated Press ke mutabiq yeh kamyabi khitte mein Trump ke ittehadi dayen bazu ki janib jhukao rakhne wale umeedwaron ki futuhat ke rujhan ke bar aks hai. Latin America ki sab se barhi maeeshat Brazil ki salana GDP 2.6 trillion dollar hai.

Jashn manane ke liye Sao Paulo aur Rio de Janeiro ke Cinelandia Square mein logon ki barhi tadad jama hui. Rio mein Bolsonaro ke hami 51 salah Rodrigo Valentim ne kaha: “Mulk tabah ho raha hai.”