Netanyahu ki Iran par intikhabat se qabl hamle ki khwahish, Trump ki manzoori na dene ka daava

Yerusalem: Israeli wazir-e-azam Netanyahu ne mubayyinah taur par intikhabat se pehle Iran par mushtarka hamle ke liye American sadr Donald Trump ko qail karne ki koshish ki, taham Trump ne fori karrawai ki manzoori nahin di.

American nashriyati idare CNN ne yeh daava apni khusoosi report mein American aur Israeli zaraye ke hawale se kiya hai. Report ke mutabiq Israel guzishta hafte se America par zor de raha tha ke woh Iran ke khilaf mumkina hamlon ki himayat kare aur zaroorat par ne par mushtarka karrawai mein bhi hissa le.

American mansoobabandi

Report mein bataya gaya hai ke sadr Trump aur aala American hukkam ne Israel ko intizar karne ka kaha aur yeh ishara bhi diya ke mustaqbil qareeb mein Iran ke khilaf mushtarka karrawai par ittefaq ho sakta hai.

CNN ke mutabiq American fauj ne Iran ke khilaf bade hamlon ke mansoobe tayyar kar rakhe hain aur sadr ki manzoori milne par 96 ghanton ke andar karrawai shuru kar sakti hai. Irani ahdaf mein fauji tansibat, johri markaz aur aham buniyadi dhancha shamil ho sakte hain, taham abhi yeh sirf mansoobabandi hai aur hamle ka hatmi elaan nahin kiya gaya.

Israel mein kal intikhabat hone ja rahe hain. Report ke mutabiq Netanyahu apni kamzor position ke baays chahte hain ke intikhabat se qabl Iran par hamla ho taake unhein hamdardi ki bunyad par vote mil saken.

Israeli mauqif

Taham Israeli wazir-e-difa Israel Katz ne is taassur ko rad karte hue kaha ke Iran par intikhabat se pehle hamle ke irade aur fauji qiyadat mein ikhtilafat ki khabrein bebunyad hain. Israeli fauj ke mutabiq is ki tawajjoh election ki security zimmedariyon par hai.

America ki janib se CNN ki report par tahal koi radd-e-amal samne nahin aaya, albatta Israeli wazir-e-azam ke daftar se jari bayan mein is report ko mustarad kiya gaya hai.

Wazeh rahe ke Iran par February mein America aur Israel ke hamlon ke baad shuru hone wali jang ne Abnaye Hormuz, aalmi tawanai ki tijarat aur khaleeji salamati ko shadeed mutassir kiya hai. June mein kashidagi kam karne ke liye hone wala muahida bhi barqarar na reh saka aur fareeqain ke darmiyan hamle dobara shuru ho gaye.