China ke sanati munafe mein September ke dauran 14.4 feesad izafa, maeeshat mein taqseem barqarar
Beijing: China ki sanati companiyon ke munafe mein September ke dauran zyada tezi se izafa hua, taham maeeshat mein barhti hui taqseem karobari aamdani par dabao daalti rahi, sarkari aadad o shumar mein Mangal ko yeh baat samne aayi.
National Bureau of Statistics ke mutabiq guzishta mah munafe mein guzishta saal ke muqable mein 14.4 feesad izafa hua. Is ke muqable mein August mein izafa 4.2 feesad tha.
Saal ke pehle nau mah mein munafa 15.5 feesad barha. January se August ki muddat mein yeh izafa 15.7 feesad tha.
Yeh aadad o shumar un companiyon par mushtamil hain jin ki bunyadi karobari sargarmiyon se salana aamdani kam az kam 2 crore yuan (30 lakh dollar) hai.
Mukhtalif shobon ke darmiyan farq numayan raha. Computer, mawasilat aur deegar electronic aalat ki tayyari ke zumre mein pehle nau mah ke dauran munafa 103.8 feesad barh gaya. Furniture saazi ke shobe mein 51.3 feesad kami record ki gayi, jis ke baais yeh sab se kamzor karkardagi dikhane wale shobon mein shamil raha.
Reuters ke mutabiq baraamdat par inhisar karne wali companiyan zyada ghair yaqini surat-e-haal ke liye tayyar ho rahi hain kyunke barhte hue tijarati surplus se bairooni dabao ka khatra barh gaya hai. Mulki talab se wabasta companiyan kamzor khapat ke baais mushkilat ka shikar hain. Is se yeh sawal paida hota hai ke aaya munafe mein izafa barqarar reh sakega.
Teesri sehmahi mein maeeshat 4.5 feesad ki sharah se barhi, jo tawaqqo se zyada thi. Is se China 4.5 se 5.0 feesad ke salana taraqqi ke hadaf ke qareeb pahunch gaya hai. Taham shobon ke darmiyan farq se zahir hota hai ke bahali badastoor ghair mutawazin hai. Baaz shobon mein musalsal kamzori companiyon ke munafe ko mutassir kar rahi hai.
Dabao company ki satah par bhi nazar aaya hai. Electric gariyon ki batteriyan banane wali duniya ki sab se bari company CATL ke khalis munafe mein haliya sehmahi ke dauran tezi se sust rawi aayi. Electric gariyon ki battery market mein sakht musabiqat ne aise waqt mein munafe ke margin ko daba diya jab China mein gariyon ki farokht mandi ka shikar thi.
Wafaqi wazir petroleum ki Amriki qaim maqam safeer se mulaqat, tawanai taawun barhane par ittefaq
Hukumat ki paanch saal mein 11 hazar arab rupay se zaid tax choot ka inkishaf
IMF ka maashi islahat mein takheer par tahaffuzat, zaraee amdan par tax par zor
Mulki zarmubadla zakhair 21.5 arab dollar tak pahunch gaye, December tak 23 arab dollar ki tawaqqo
State Bank ne sharh-e-sood 11.5 fisad se barha kar 12 fisad kar di
Wazir-e-khazana Aurangzeb: Khapat par mabni taraqqi ki taraf wapsi se bahali char panch saal peechhe jayegi
Hormuz mein tankers par hamle, Saudi tanseebat nishane par; Brent khaam tel paanch maah ki buland satah par
Haftawar Mehngai mein 0.65 fisad izafa, salana sharah 11.85 fisad ho gayi
Pakistan ki bairooni maliyati position kamzor hone ka khadsha, IMF ki tanbeeh
PSX mein mandi, KSE-100 index 1,550 points gir kar 162,375 par band
IMF ki pesh goi: khitte ki maeeshat is saal 1.3 feesad sikdegi, 2027 mein 6.6 feesad numo
