Wazir-e-azam ki zaraee baramadat barhane ke liye nayi mandiyan talash karne ki hidayat

Wazir-e-azam ki zere sadarat zaraee shobe aur zaraee baramadat ke farogh se mutaliq aala sathi ijlas Islamabad mein hua, jis mein mulk mein per acre paidawar barhane, Zaraat mein jadeed Technology ke istemal, livestock ki taraqqi aur zaraee baramadat mein izafe ke liye mukhtalif tajaweez ka jaiza liya gaya.

Wazir-e-azam ne kaha ke zaraee shoba Pakistan ki maeeshat ki taraqqi aur istehkam mein kaleedi kirdar ada karta hai, is liye zaraee paidawar aur baramadat mein izafe ke liye murabbat iqdamat ki zaroorat hai.

Ijlas mein briefing ke dauran bataya gaya ke guzishta maali saal Pakistan ki zaraee baramadat 5.18 arab dollar rahin, jin mein chawal, fisheries, halal gosht, aaloo, til, tambaku, aam aur makai numayan masnooat shamil hain.

Wazir-e-azam ne zaraee baramadat ke farogh ke liye beroon-e-mulk Pakistani missions mein taynaat commercial officers ko moassir kirdar ada karne ki hidayat ki aur kaha ke aalami mandiyon mein Pakistani zaraee masnooat ki rasai barhane aur nayi mandiyan talash karne ke liye murabbat hikmat-e-amali apnayi jaye.

Ijlas mein zaraee masnooat ke liye value chains tashkeel dene, zaraee baramad kunindgan ko financing ki sahuliyat faraham karne aur behtar zaraee tareeqa-e-kaar ke farogh ke liye Pakistan Good Agriculture Practices nizam tashkeel dene ki tajaweez bhi pesh ki gayin.

Briefing mein bataya gaya ke China, Iran aur khaleeji mumalik Pakistan ki zaraee baramadat ke liye ahem mandiyan hain, jabke National Agriculture and Food Security Council ko bhi faal kiya jayega, jis mein wuzra-e-aala apne soobon ki numainda>gi karenge.

Ijlas mein mulk bhar ke kisanon aur zaraee zameen ke record ko digital banane ke liye Digital Farmers Diary aur Agri Stack tashkeel dene ki tajweez bhi pesh ki gayi. Is nizam ke tehat zameen aur pani ki janch ke record bhi digitize kiye jayenge.

Wazir-e-azam ne kisanon ko faslon ki nigrani ke liye dastiyab mobile app se aagah karne ke liye moassir media muhim chalane ki hidayat bhi ki.

Ijlas mein wafaqi wuzra Ahsan Iqbal, Rana Tanveer Hussain, Ahad Khan Cheema, Musadik Malik, Jam Kamal Khan, Attaullah Tarar, Shaza Fatima aur deegar aala hukkam ne shirkat ki.