Speaker National Assembly ka system ki karkardagi par izhar-e-itminan, muzakirat par zor

Ayaz Sadiq ne kaha ke system ke baare mein behtar faisla awam hi kar sakte hain, maashi halat pehle bohat kharab ho chuke the lekin ab behtari ki janib barh rahe hain.

Unhon ne kaha ke Pakistan ne Bharat se jang jeeti, phir Iran America salesi karayi jis se Pakistan ki izzat barhi hai, poori duniya Pakistan ke salesi ke kirdar ko tasleem karti hai.

Speaker National Assembly ne kaha ke jo log aiwan mein hukumat ko sharminda karte hain, bataur custodian of the house meri zimmedari hai ke mehnat karne walon ki mehnat zaya na ho, waqfa sawalat mein mutalliqa wuzara aur secretaries mojood na hon to sakhti karna padti hai.

Ayaz Sadiq ne kaha ke PTI wale mujh se milte rehte hain, PPP aur hukumat ke darmiyan pehle bhi bataur salis baat cheet mein shamil tha, ab bhi hoon, donon jamaaton ke ek doosre ke sath issues hain, umeed hai woh hal ho jayenge.

Unhon ne kaha ke PTI ko committees mein wapas aana chahiye lekin unhon ne maidan khula chhora hua hai, PTI ki adam hazri se committees ka kaam nahin ruk raha lekin woh shirkat karke behtar ehtesab kar sakte hain, committees mein hukumat ke ehtesab aur islah ke liye tajaweez deni chahiyen.

Naye soobon ke hawale se Speaker ne kaha ke naye soobon se mutalliq har kisi ki apni raye hai, naye soobon par bahas karne aur raye dene mein koi harj nahin, koi maqami hukumaton aur koi naye soobon ki baat kar raha hai.

Ayaz Sadiq ne kaha ke har masle ka hal baat cheet aur muzakirat se hota hai, lar jhagar kar aur ehtijaj se kisi masle ka hal nahin nikalta, muzakirat ke hawale se PTI ghair yaqeeni surat-e-haal ka shikar hai, jab woh muzakirat ki baat karte hain to Social Media se dar jate hain.

Speaker National Assembly ne kaha ke in logon ki committee baith kar faisla kar le to acha hoga.