Qatar jald aqlimi shirakat daron ke sath nayi difai shirakat dari ka elan karega

Doha: Qatar ne aqlimi shirakat daron ke sath mil kar nayi difai shirakat dari qayam karne ka elan jald karne ka faisla kiya hai.

Global Security Forum se khitab karte hue Qatar ke naib wazir-e-azam Sheikh Saud bin Abdulrahman Al Thani ne kaha ke aqlimi shirakat daron ke sath naye difai iqdamat par kaam jari hai aur jald nayi difai shirakat dari ka elan kiya jayega.

Unhon ne bataya ke Qatar ne haal hi mein apni difai salahiyaton ka tafseeli jaiza liya, jis ke baad fizai difa, drone hamlon ki rok tham, cyber security aur aabi salamti ko awleen tarjihat mein shamil kiya gaya.

Naib wazir-e-azam ne America ke sath difai taawun ka zikr karte hue kaha ke is shirakat dari ne khaleeji khitte ki majmooi difai salahiyaton ko mazeed mazboot banaya hai.

Sheikh Saud bin Abdulrahman Al Thani ne inkishaf kiya ke Iran jang ke dauran 90 feesad se zaid hamlon ko mushtarka maharat aur kai dahaiyon par muheet askari sarmaya kari ki badaulat kamyabi se nakam banaya gaya.