Qarzon par adaigiyan 9 mah mein 4.9 kharab rupay, 14 bare mansoobe 11.86 arab dollar bairooni qarzon se mukammal honge

Islamabad: Pakistan ke mulki aur ghair mulki qarzon par sood aur adaigiyon ka bojh qaumi khazane par bhari parne laga hai. Hukumat ne guzishta maali saal ke ibtidai 9 mah ke dauran qarzon ki mad mein 4.9 kharab rupay ada kiye.

Wizarat-e-khazana ki dastawezat ke mutabiq mulki aur ghair mulki qarzon ka ek bara hissa adaigiyon ke tawazun ko barqarar rakhne aur naqd maali zaruriyat poori karne ke liye istemal kiya ja raha hai, jabke tawanai, mawasalat, Sailab se bahali aur deegar aham shobon ke mansoobe bhi bairooni maali moaawanat se mukammal kiye ja rahe hain. Bairooni qarzon, sood ki adaigiyon aur qarzon se zer-e-tameer bare qaumi mansoobon ki tafsilat National Assembly mein pesh kar di gayi hain.

Qarzon ka istemal

Dastawezat ke mutabiq mulki aur ghair mulki qarzon mein se 11.42 arab dollar adaigiyon ke tawazun aur naqd maali moaawanat ke liye istemal hue, jabke 3.09 arab dollar tawanai ke mansoobon aur 1.69 arab dollar Sailab se bahali ke iqdamat par kharch kiye gaye.

Hukumat is waqt bairooni qarzon ki madad se 14 bare qaumi mansoobon par kaam kar rahi hai, jin ki majmooi maliyat 11.86 arab dollar batayi gayi hai. In mein tawanai, bijli ki tarseel, motorways, shehri transport, aala Taleem, samaji tahaffuz aur mausamiyati tabdiliyon se nimatne ke mansoobe shamil hain.

Wizarat-e-tawanai ke saat bare mansoobe bhi bairooni qarzon se mukammal kiye ja rahe hain. In mein 247.60 million dollar maliyat ka Jamshoro tawanai mansooba, 475 million dollar ka Tarbela tauseei mansooba, 225 million dollar ka Dasu power project aur 93.22 million dollar maliyat ka Mohmand Dam mansooba shamil hain. Qaumi transmission modernization mansooba 192.87 million dollar ki lagat se bairooni qarzon ke zariye mukammal kiya jayega.

Tawanai ke shobe mein Saudi oil facility programme ke liye 3.38 arab dollar jabke ITFC oil and LNG financing facility programme ke liye do arab dollar ki bairooni maali moaawanat bhi dastawezat mein zahir ki gayi hai.

Mawasalat aur shehri taraqqi ke shobon mein Sukkur ta Multan motorway aur Karachi mobility mansoobe bhi bairooni qarzon se mukammal kiye jane wale mansoobon mein shamil hain. 1.5 arab dollar maliyat ka building resilient count programme bhi bairooni maali moaawanat se mutaalliq mansoobon mein shamil hai.

Dastawezat ke mutabiq hukumat aala Taleem ke farogh, qudrati afaat se nimatne, samaji tahaffuz aur mausamiyati tabdiliyon ke khilaf istedad barhane ke mansoobon ke liye bhi bairooni qarzon par inhisar kar rahi hai.

National Assembly mein pesh kardah tafsilat se zahir hota hai ke Pakistan ki maali zaruriyat poori karne aur taraqqiati mansoobon ki takmeel mein bairooni qarzon ka aham kirdar hai, taham qarzon par bhari adaigiyan aur sood ki lagat qaumi maali wasail par musalsal dabao ki nishandahi karti hain.