PIA ki Jeddah pahunchne wali flight mein aag ki ittela par musafiron ka hangami akhraj

Zaraye ke mutabiq Air Base tayyara ko Jeddah airport ke parking stand par parking ke dauran mazkura waqia pesh aaya jahan engine mein aag ki ittela par pilot ne hangami inkhila ka amal shuru kiya.

Zaraye ka kehna hai ke musafiron ko hangami akhraj ke raston se slides khol kar behifazat bahar nikal liya gaya taham is dauran chand musafiron ko maamooli choten aayin, musafiron ko tibbi muaene aur ilaj ke liye Jeddah airport ke clinic muntaqil kiya gaya.

Jeddah airport ke fire shobe ke hukkam bhi fori fire brigade ke hamrah tayyare ke paas pahunche jahan PIA Jeddah hukkam ne airport ke tamam hukkam aur security department ko fori taur par mutalla kiya jabke Jeddah airport hukkam ne PIA ke amle se maamle ke mutaliq poochh bhi ki.

Tarjuman PIA ka kehna hai ke tayyare ki Jeddah airport par normal landing hui, tayyara jetty par laga tha is dauran ground staff ne tayyare ke ek engine mein aag ka shubha zahir kiya, pilot ne SOP ke tehat musafiron ko bahar nikalne ke liye tayyare ke emergency slides (chute) khole.

Tarjuman ne kaha ke kuch musafir jetty ke zariye tayyare se bahar aaye aur baqi musafiron ko emergency slides (chute) ke zariye tayyare se bahar nikala gaya jabke karrawai ke dauran koi musafir zakhmi nahin hua aur tamam musafir mehfooz hain.

PIA tarjuman ke mutabiq tayyare ki tafseeli jaanch partal ke baad aag ka shubha ghalat sabit hua, mutasira tayyare ki Jeddah Lahore flight 20 se 22 ghante takheer ka shikar ho gayi, Jeddah Lahore flight ke 40 musafiron ko hotel bhej diya gaya jabke baqi musafir ghar chale gaye.