Wazir-e-azam Shehbaz Sharif ne 2027 ke liye gandum ki mujawwaza qeemat 4500 rupay fi mann muqarrar kar di

Islamabad: Wazir-e-azam Muhammad Shehbaz Sharif ne kisan dost iqdam karte hue 2027 ke liye gandum ki mujawwaza qeemat 4500 rupay fi mann muqarrar kar di hai.

Paidawari laagat mein izafe ke pesh-e-nazar guzishta baras ki nisbat qeemat mein 1000 rupay fi mann izafa kiya gaya hai. Guzishta saal gandum ki qeemat 3500 rupay fi mann muqarrar thi.

Jari elamiye ke mutabiq is faisle mein Sadr-e-mamlikat Asif Ali Zardari aur Quaid Muhammad Nawaz Sharif ki rehnumai aur wuzara-e-aala Punjab o Sindh ki mushawarat o taawun shamil raha.

Wazir-e-azam ne mushawarati amal mein taawun aur qabil-e-qadr tajaweez pesh karne par Wazir-e-aala Punjab Maryam Nawaz ka khusoosi shukriya ada kiya aur is mushawarati amal mein un ke kirdar ko saraha. Unhon ne Wazir-e-aala Sindh Syed Murad Ali Shah ke taawun par bhi izhar-e-tashakkur kiya.

Wazir-e-azam ke mutabiq is iqdam ka maqsad kisanon ko barhti hui paidawari laagat, petrol ki qeematon mein izafe aur Mehngai ke dabao se relief faraham karna hai. Kisanon ko gandum ki kasht ke liye muassir targheeb dena faisle ke awwaleen maqasid mein shamil hai.

Shehbaz Sharif ne kaha ke tawaqqo hai ke nayi mujawwaza qeemat se kisanon ko apni paidawari laagat poori karne aur munasib munafa hasil karne mein madad milegi.

Unhon ne kaha ke guzishta barson ke dauran kisanon ko Mehngai aur zarai akhrajat mein izafe ke baais maali mushkilat ka samna raha, jabke Pakistan ko guzishta do barson mein gandum import bhi karni padi.

Wazir-e-azam ke mutabiq gandum ki mujawwaza qeemat mein izafe ka kaleedi faisla mulki ghizai tahaffuz ko mazboot banane, maqami paidawar ki hausla afzai aur zarai shobe mein istehkam ke liye aham pesh raft sabit hoga.

Hukumat ko tawaqqo hai ke mujawwaza qeemat ke taayyun se kashtkar gandum ki kasht mein zyada dilchaspi lenge, jis ke nateeje mein aainda season mein bharpoor bowai aur mulki paidawar mein izafe ke imkanat roshan honge.

Wazir-e-azam ne kaha ke yeh iqdam kisanon ki maashi behtari, zarai maishat ke istehkam aur mulk ko ghizai zaruriyat ke zimn mein zyada khudkafeel banane ki koshishon mein aham sang-e-meel sabit hoga. Tawaqqo hai ke saal 2027 Pakistan ke zarai shobe aur kisanon ki khushhali ke liye musbat nataij ka hamil hoga.