Trump ka daawa: 250 feesad tariff ki dhamki se Pak-Bharat jang ruki, 11 tayyare giraye gaye

Florida: American sadr Donald Trump ne wast mudati intekhabat ki muhim ke silsile mein rally se khitab karte hue aik baar phir May 2025 ki Pak-Bharat jang ka zikr kiya aur daawa kiya ke is dauran 11 tayyare giraye gaye.

Bharati website WION ke mutabiq Trump ne kaha ke unhon ne donon johri taqaton se kaha tha ke agar larai jari rahi to woh America se tijarat nahin kar sakein ge aur donon par 250 feesad tak bhari tariff lagaya jayega. Un ke baqaul donon mulk shadid naraz the, taham bil akhir firing band kar di gayi.

Trump ne kaha ke unhon ne aath jangein rukwayin, magar Nobel inaam nahin mila. Un ka daawa tha ke is silsile mein unhon ne United Nations ko aik phone call bhi nahin ki. Un ke mutabiq aath mein se paanch jangein tariff ke zariye rukwayi gayin.

Trump ne Iran ke hawale se kaha ke Iran ke khilaf aik aur operation ho sakta hai aur America jang jald khatam bhi kar sakta hai. Un ke mutabiq Iran ke maamle ke baad Cuba se nimta jayega aur deal ko hatmi shakl dene ke liye Marco Rubio ko bheja jayega. Unhon ne yeh bhi kaha ke Strait of Hormuz se tel ki tarseel jari hai aur jang se pehle ke muqable mein zyada tel baraamad ho raha hai.

Bharat Trump ke salisi ke daawe ko baar baar mustarad kar chuka hai. New Delhi ka mauqif hai ke fauji karrawai rokne par mufahimat donon mulkon ke darmiyan barah-e-raast hui. Bharati bayan ke mutabiq us ne 22 April ke Pahalgam hamle ke baad May 2025 mein Operation Sindoor kiya aur 10 May ko Pakistan ki darkhwast par karrawai roki gayi.

TRT World ke mutabiq Pakistan ka daawa hai ke us ne saat Bharati tayyare giraye, jin mein teen Rafale, aik Sukhoi Su-30 aur aik MiG-29 shamil the. Idare ke mutabiq Bharati zaraye ne ibtida mein Bharat ke zer-e-intezam Kashmir mein teen jangi tayyaron ke girne ka aitraf kiya, jabke baaz Bharati hukkam ne nuqsan tasleem kiya magar tadad nahin batayi. Pakistan ne Trump ko Nobel Aman Inaam ke liye namzad kiya tha.