National Assembly: Teen naye bill committeon ke supurd, teen tarmeemi bill manzoor, ijlas Jumeraat tak multavi

Islamabad: National Assembly mein qanoon sazi ke dauran teen naye bill mutaalliqa qaimah committeon ke supurd kar diye gaye, jabke teen tarmeemi bill manzoor kar liye gaye. Ijlas Jumeraat tak multavi kar diya gaya.

Bilal Azhar Kayani ne Companies tarmeemi bill pesh kiya, jabke Aqeel Malik ne sanati taluqat tarmeemi bill aur immigration tarmeemi bill aiwan mein pesh kiye. Teenon bill mazeed ghaur aur jaize ke liye mutaalliqa qaimah committeon ke supurd kar diye gaye.

Ijlas mein mahfooz shuda dastaveezati mawad tahaffuz o baramadi control tarmeemi bill, matrooka amlaak intezam o insiram tarmeemi bill aur marakiz fazilat tarmeemi bill bhi manzoor kar liye gaye.

Opposition leader ka khitab

Opposition leader Mahmood Khan Achakzai ne kaha ke ek soobe ki parliament par hamla kiya gaya aur haq-e-rai dahi ka mazaq uraya gaya hai.

Unhon ne daawa kiya ke chhe, saat ya aath arkan National Assembly lapata hain aur sawal uthaya ke Khyber Pakhtunkhwa ke chief minister kahan hain aur aaya woh zinda hain.

Speaker ko mukhatib karte hue unhon ne kaha ke aap aiwan ke custodian hain, arkan ke production orders jari karna aur un ke tahaffuz ko yaqeeni banana aap ki zimmedari hai.

Unhon ne France mein Mehngai ke khilaf muzahiron ka hawala dete hue kaha ke wahan lakhon afrad sadkon par nikle, lekin abhi tak ek goli nahin chali. Baad azan ijlas Jumeraat tak multavi kar diya gaya.