JD Vance ne Houthiyon se barah-e-raast rabte ki tasdeeq kar di

British media ke mutabiq JD Vance ne Houthiyon se barah-e-raast rabte ki tasdeeq ki hai, Houthiyon ne America ko 2025 ki jang bandi barqarar rahne ki yaqeen dehani karayi hai.

Is mauqe par Houthiyon ne America ko kaha ke Bahira-e-Ahmar mein American behri jahaz un ka hadaf nahin, Saudi Arabia se mansalik jahazon ko hadaf samjha jata hai.

Doosri janib America ne Yemen mein Houthi pesh qadmi par tashweesh zahir ki aur Saudi Arabia ki fauji madad nahin ki, British khabar agency ke mutabiq Saudi Arabia ne sadr Donald Trump se Houthiyon par hamlon ke liye baat ki thi jo Trump ne radd kar di.

Yaad rahe ke America ne March 2025 mein Houthiyon ko ghair mulki Dehshatgardi tanzeem qarar diya tha.

Qabl azin American nashriati idare Axios aur British khabar agency ke mutabiq American safarkaron ne Oman mein Yemen ke Houthi numainDon se mulaqat ki hai, yeh mulaqat aise waqt mein hui jab Houthiyon ne haliya dinon mein Bahira Ahmar ke sahili ilaqon mein badi pesh qadmi karte hue Saudi himayat yafta forces ko paspath kar diya hai.

Axios ke mutabiq yeh mulaqat Omani hukumat ki madad se Muscat mein hui, aur is mein America aur Houthiyon ke darmiyan jang bandi ko barqarar rakhne aur Strait of Bab el-Mandeb ke tahaffuz ko yaqeeni banane par tawajjoh markooz ki gayi.

Aik Yemeni zaree ke mutabiq Houthiyon ne yeh bhi kaha ke woh Israeli ya digar tijarti jahazon par hamle nahin karenge, taham Saudi Arabia se talluq rakhne wale behri jahaz is istisna se bahar honge.

American mahakma-e-khariija ne is makhsoos mulaqat par tabsira karne se gurez kiya tha, taham tarjuman ka kehna tha ke Bahira Ahmar mein jahaz rani ki azadi ka tahaffuz aur Middle East se Dehshatgardi ki sargarmiyon ki rok tham America ke bunyadi mafadat mein shamil hain.