Islamabad ka naya intizami naqsha wazir-e-azam ko pesh, 27 rukni assembly aur chief executive baare

Hukumati zaraye ke mutabiq aala satah ki khusoosi committee ne wafaqi daral-hukumat ke mustaqbil ke intizami dhanche se mutaliq mujawwaza draft wazir-e-azam ko pesh kar diya jis mein Islamabad ko soobai tarz ki intizami aur maali khudmukhtari dene, muntakhib assembly aur apne chief executive ke qayam ki sifarish ki gayi hai.

Mujawwaza draft ke mutabiq 27 rukni Islamabad Capital Territory Assembly qayam karne ki tajweez hai, jis mein 21 arkan barah-e-raast awam ke vote se muntakhib honge, jabke khawateen ke liye 5 aur aqliyyaton ke liye ek makhsoos nashast rakhi jaye gi.

Assembly ke intikhabat Election Commission of Pakistan ke tehat karane ki sifarish ki gayi hai jabke arkan par aaeen ke article 62 aur 63 ka itlaq hoga.

Draft mein Islamabad ke liye muntakhib chief executive muqarrar karne ki tajweez bhi shamil hai, jo mayor ya wazir-e-aala kehlaye ga aur muntakhib assembly ke samne jawab deh hoga.

Daral-hukumat ke intizami umoor chalane ke liye chief secretary aur chaar secretaries taenat karne jabke hukumat ke tehat 27 intizami mehkamay qayam karne ki sifarish ki gayi hai.

Sehat, taleem, mahooliyat aur shehri sahuliyat samet mutaddid shobay muntakhib Islamabad hukumat ke daira-e-ikhtiyar mein dene ki tajweez hai, jabke qanoon o aman aur master planning ke muamilat wafaq ke paas rakhne ki sifarish ki gayi hai.

CDA ke tamam ikhtiyarat aur faraiz bhi Islamabad Capital Territory hukumat ko muntaqil karne ki tajweez samne aayi hai.

Mujawwaza nizam ke tehat Local Government Act 2015 ke tehat kaam karne wale deegar idaron ke faraiz bhi Islamabad Capital Territory hukumat ko muntaqil karne ki sifarish ki gayi hai.

Islamabad mein qayam idaron ko poore ICT ke liye kaam karne ka paband banane ki tajweez hai jab ke poore Pakistan ke liye qayam wafaqi idare badastoor Islamabad mein kaam karte rahenge.

Khusoosi committee ne Islamabad ke naye intizami nizam ke liye jamae aur muttahida qanoon sazi ki sifarish ki hai, jis mein CDA Ordinance 1960 mein zaroori aaeeni tarameem bhi shamil hongi, Islamabad Capital Territory hukumat ko apne umoor chalane ke liye qawaid-e-kaar khud murattab karne ka ikhtiyar dene ki tajweez bhi draft ka hissa hai.

Khayal rahe committee mein wazir mansoobah bandi Ahsan Iqbal, wazir-e-dakhila Mohsin Naqvi, wazir-e-azam ke mushir Rana Sanaullah aur wafaqi wazir Musaddiq Malik samet aala intizami o maali hukkam shamil rahe.

Mazeed baraan secretary dakhila, secretary cabinet, secretary khazana, secretary taleem, secretary National Health Services, commissioner Islamabad aur chairman CDA ne bhi naye governance model ki tayyari mein hissa liya.