Irani sadr New York rawana, aalami biradari tak Iran ka paigham pahunchane ka azm

America rawangi se qabl Masoud Pezeshkian ne kaha ke aalami forum par Iran ka mauqif bharpoor andaz mein pesh karoon ga, Irani awam ko darpesh mushkilat aur mukhalifeen ke jaraim se duniya ko agah karein ge, General Assembly ka ijlas Iran ka paigham aalami biradari tak pahunchane ka aham mauqa hai.

Idhar New York pahunch kar Iran ke wazir-e-kharija Abbas Araghchi ne kaha ke Iran ab bhi halat-e-jang mein hai, jang ke baad paida hone wali surat-e-haal barqarar hai.

Abbas Araghchi ne kaha ke maghribi aur yoropi mumalik Palestine, Gaza, Lebanon aur Iran maamle par khamosh rahe, maghrib Iran mein kisi ek shakhs ko masla darpesh hone par insani huqooq ka shor machata hai.

Unhon ne kaha ke Aqwam-e-Muttahida aalami aman aur salamti barqarar rakhne mein nakam rahi, Aqwam-e-Muttahida par aitemad khatam ho chuka, bahali na-guzeer hai.

Irani wazir-e-kharija ne bataya ke sadr Masoud Pezeshkian General Assembly se khitab karein ge, mutaddid mumalik ke sarbarahon ke sath do-tarfa mulaqaten bhi karein ge.

Unhon ne bataya ke sadr Pezeshkian New York mein mukhtalif media idaron ko interviews bhi dein ge, Iran ka bunyadi maqsad aalami platform par Irani awam ke huqooq, mufadat aur mauqif ka difa karna hai.