Irani Pasdaran-e-Inqilab ke tarjuman Hussain Mohebbi ne America awam ke samne kai sawal rakh diye

Irani Pasdaran-e-Inqilab ke tarjuman Hussain Mohebbi ne America awam ke samne kai sawal rakh diye.

Tarjuman Irani Pasdaran-e-Inqilab Hussain Mohebbi ne Tehran mein press conference karte hue kaha America ko apna difa karna hai to duniya bhar mein 800 fauji adde kis liye hain, itne bade fauji budget ka kya jawaz hai, jahan bhi qatl-o-gharat hoti hai us ke tane bane America se ja milte hain, America awam ko is bare mein sochna chahiye ke yeh sab kyon ho raha hai.

Tarjuman Pasdaran-e-Inqilab ne kaha log jante hain ke America fauj jaraim mein mulawwis hai, America sadr bahut se mumalik ka safar karne ki jurrat kyon nahin karta, America mein 3 crore 90 lakh afrad khat-e-ghurbat se neeche kyon zindagi guzar rahe hain, America khushhal hai to lakhon log beghar kyon hain, America mein aaj bhi sehat-e-amma ka koi jamey nizam maujood nahin

Mazeed kaha America hukmran apne hi awam se bahut se jhoot bolte hain, jab hum Marg bar America ka nara lagate hain to yeh America policiyon par tanqeed hai, America awam ki halakat nahin, is liye hum ne America awam se haqiqat pasandana andaz mein baat karne ka faisla kiya hai.

Aqwam-e-Muttahida ke General Assembly ke ijlas ke mauqe par Irani wafd ko zaraye iblagh ke munasib wasail maisar nahin the is liye apna paigham America awam tak wazeh andaz mein nahin pohncha sake, Iran johri hathiyar hasil karne ki koshish kar raha hai yeh is sadi ka sab se bara jhoot hai