Iran mein American hamle: Iqwam-e-Muttahida mission ki report mein Minab school hamle ka zimmedar American fauj ko qarar de diya gaya

Nayi report ke mutabiq mission ne February mein shuru honay wali jang ke dauran Iran mein American fauji karrwaiyon aur guzishta baras December ke awakhir mein shuru honay wali mulk geer badamni se nimatne ke liye Irani hukumat ke iqdamat ka jaiza liya hai.

Report mein kaha gaya ke Minab shehr ke Shajra Tayyaba primary school par hamle ke zimmedar American fauji thay. Irani hukkam ke mutabiq hamle mein 120 bachchon samet 150 se zaid afraad jaan bahaq hue.

Mission ke mutabiq hamle mein shehriyon ki halakat aur shehri infrastructure ko nuqsan pahuncha, jo International insani qanoon ki khilaf warzi ke zumre mein aata hai.

Report mein kaha gaya ke school Pasdaran-e-Inqilab ke ek complex ke qareeb waqe tha, taham American fauj ke targeting data mein school se mutaliq maloomat update na karna aur hamle se qabl yeh tasdeeq na karna ke imarat fauji hadaf hai ya nahin, mehaz ghaflat se barh kar tha.

Iqwam-e-Muttahida ke mahireen ke mutabiq school wazeh taur par shanakht ke qabil shehri imarat tha aur unhein aisa koi saboot nahin mila ke ise kabhi fauji maqasid ke liye istemal kiya gaya ho.

Report mein Lamerd ke ek sports center par hamle ka bhi zikr kiya gaya hai. Mission ke mutabiq hamle se qareebi rehaishi imaraton aur ek school ko shadeed nuqsan pahuncha jabke 22 aam shehri halak ya zakhmi hue, jise report mein jungi jurm qarar diya gaya hai.

Dusri janib American Central Command ne March mein dawa kiya tha ke American afwaj ne is roz Lamerd shehr par koi hamla nahin kiya.

Fact finding mission ne apni report mein yeh bhi kaha hai ke Irani hukumat ne hukumat mukhalif muzahiron ko dabane ke liye kiye gaye muhlik crackdown ke dauran insaniyat ke khilaf jaraim ka irtikab kiya. Iqwam-e-Muttahida ke is mission ka mandate Iran mein insani huquq ki mubayyina khilaf warziyon ki dastawez bandi aur tehqiqat par mushtamil hai.