Houthiyon ka Saudi Arabia par drone hamla, aik shehri jaan bahaq, Pakistani samet 2 zakhmi

Aalmi khabar rasan idare ke mutabiq Saudi civil defence ke tarjuman ne bataya ke waqia Jumeraat ko Taif governorate mein pesh aaya, jahan Houthiyon ke drone ko faza mein hi rok kar tabah kar diya gaya.

Tarjuman ke mutabiq drone ke tukde Taif shehr ke mukhtalif maqamat par gire, jis ke nateeje mein gharon aur gaadiyon ko bhi nuqsan pohancha. Waqie mein aik Yemeni shehri jaan bahaq jabke do afraad zakhmi hue.

Zakhmiyon mein aik Saudi khatoon aur aik Pakistani shehri shamil hain, dono ko tibbi imdad ke liye hospital muntaqil kar diya gaya. Pakistani shehri ki halat tashweshnak batai gayi hai.

Saudi hukkam ke mutabiq drone Houthiyon ne sarhadi ilaqe se launch kiya tha aur is ka rukh Taif shehr ki janib tha, taham Saudi fazai difa ne ise hadaf tak pohanchne se pehle hi rok liya.

Hukkam ka kehna hai ke drone faza mein tabah hone ke bawajood is ke malbe ke shehri abadi mein girne se jaani o maali nuqsan hua