Darja hararat mein izafe ka imkan, mutalliqa idare alert rahein: NDMA

Emergency Response Committee ka ijlas NDMA headquarters mein hua, jis mein chairman NDMA Lieutenant General Inam Haider Malik, PDMA, Mehkama Mausamiyat aur mutalliqa federal o soobai idaron ke numainDgan ne shirkat ki.

Ijlas mein mulk ki maujooda mausami soorat-e-haal, darja hararat mein izafe, daryaon mein bahao ki soorat-e-haal aur aainda dinon mein mutawaqqa mausami soorat-e-haal ka jaiza liya gaya.

NDMA ki jaanib se Emergency Response Committee ko maujooda mausami soorat-e-haal par briefing di gayi. NDMA ne bataya ke Pakistan mein is waqt monsoon ka koi faal nizam maujood nahin, taham mulk ke mukhtalif ilaqon mein aainda dinon ke dauran darja hararat mein izafe ka imkan hai.

NDMA ke mutabiq zyada darja hararat wale ilaqon mein barhte hue darja hararat ke nateeje mein mumkina asraat ke pesh-e-nazar mutalliqa idare alert rahein.

Ijlas mein NDMA ke National Emergencies Operation Centre (NEOC) ki jaanib se mulk ki mausami aur hydrological soorat-e-haal ki musalsal nigrani jari rakhne aur mausami soorat-e-haal mein kisi bhi mumkina tabdeeli se mutalliq barwaqt warnings aur advisories ke ijra ko yaqeeni banane par zor diya gaya.

Federal, soobai aur zilai satah par mutalliqa idaron ke darmiyan moassir rabta aur coordination barqarar rakhne ki hidayat bhi ki gayi.

Professor Ahsan Iqbal ne kaha ke tamam mutalliqa idare kisi bhi mumkina mausami ya hydrological khatre se nimatne ke liye operational taiyari barqarar rakhein.

NDMA ke mutabiq NEOC ke zariye mulk ki mausami o hydrological soorat-e-haal ki musalsal nigrani jari rakhi jayegi jabke awam aur mutalliqa idaron ko mumkina khatrat se barwaqt aagah karne ke liye mausami soorat-e-haal ke mutabiq advisories jari ki jayengi.