Bharat ka Sindh Tas muahide se inkar na-qabil-e-fehm hai: Sherry Rehman

Ghair-mulki TV channel ko interview dete hue Sherry Rehman ka kehna tha ke Sindh Tas muahida sarhad paar pani ki taqseem ke liye ek aham aalmi misaal hai, Sindh Tas muahida pani ki taqseem, maloomat ke tabadle aur tanazeat ke hal ka wazeh nizam deta hai.

Unhon ne kaha ke Sindh Tas muahide mein yaktarfa muattali ya ose ghair-faal qarar dene ki koi shaq mojood nahin, muahide ko yaktarfa taur par muattal ya nazar-andaz karna sangeen qanooni sawalat paida karta hai, salsi court aur ghair-janibdar mahir ka tareeqa-e-kaar tanazeat ke hal ke do alag raste hain, Pakistan Sindh Tas muahide ke tahat dastiyab qanooni raston ka jaiza le raha hai.

Rehnuma Peoples Party ka kehna tha ke hum tanazea ka pur-aman hal chahte hain, pani kisi naye tanazea ka sabab nahin banna chahiye, Pakistan junubi Asia se aage ilaqai istehkam mein kirdar ada kar raha hai.

Sherry Rehman ne mazeed kaha ke Pakistan, Saudi Arabia aur Turkiye ka difai taawun kisi makhsoos mulk ke khilaf nahin, Pakistan tanazea ke bajaye bahmi mufad aur ilaqai taawun ko tarjeeh deta hai.