America mein qanooni immigration nisf reh gayi, February mein sirf 26 hazar immigrant visas jari

Washington: Amriki sadr Donald Trump ki intezamia ne visas ke ijra par pabandiyon, safari mumani’aton aur dakhle ke sakht qawanin ke zariye America mein qanooni immigration ki sharah nisf kar di hai, jo jadeed Amriki tareekh mein immigration mein hone wali numayan tareen takhfeef mein se ek hai. Yeh baat Amriki akhbar ki ek report mein batayi gayi.

Report ke mutabiq Amriki mahkama-e-kharija ne February mein sirf 26 hazar immigrant visas jari kiye, jo green card aur qanooni mustaqil rihayish ka darja hasil karne ki ijazat dete hain. Trump ke iqtidar sambhalne se qabl ke barson mein ausatan har mahine 52 hazar aise visas jari hote the. Akhbar ne yeh ada’ad o shumar hukumat ke taza tareen dastiyab ada’ad o shumar ke hawale se report kiye.

Pabandiyon ki zad mein aane wale mumalik

Report mein bataya gaya ke guzishta saal ke akhir aur rawan saal ke aghaz mein nafiz policyon ke bais 91 mumalik se America mein qanooni immigration taqriban namumkin ho gayi, jabke mazeed 61 mumalik ke shehriyon ke liye immigrant visas ki dastiyabi bhi mehdood kar di gayi. Africa aur mashriq-e-wusta ke mumalik bil-khusus mutasir hue, jabke Muslim aksariyati mumalik se immigration mein 90 fisad se zyada kami record ki gayi.

91 mumalik ki tadad mein safari pabandiyon ya mehdood dakhle ki zad mein aane wale 39 mumalik, Filistini Authority ya Filistini shehriyon se mutaliq pabandiyan, aur 75 mumalik par immigrant visas ke ijra ki mo’attali shamil hain.

Report ke mutabiq Trump ki White House wapsi ke baad pehle saal mein visas ki tadad mein taqriban 10 fisad ki mamooli kami hui thi. Taham January mein tawseeh shuda safari pabandiyon ke tahat 39 mumalik ke shehriyon ke liye visas ke husool ya America mein dakhle par pabandiyan lag gayin, jabke mazeed 52 mumalik ke shehriyon ke liye immigrant visas ka ijra rok diya gaya. Ek mahine qabl nisbatan kam tarkeen-e-watan wale mumalik ke shehriyon ke liye diversity immigrant visa program bhi mo’attal kiya gaya tha.

Amriki intezamia ne in iqdamat ka difa karte hue kaha tha ke in ka maqsad visa darkhast dehandgan ki security khatraat aur mustaqbil mein sarkari muraa’at se mumkina istifade ke hawale se jaanch parthal behtar banana hai.

Non-immigrant visas mein bhi kami

New York Times ke mutabiq in policyon se sab se zyada immigrant visas mutasir hue, taham talba aur karkunon ke non-immigrant visas mein bhi guzishta saal ke muqable mein 30 fisad kami aayi. February mein siyahati aur karobari douron ke visas ki tadad bhi taqriban 25 fisad kam rahi.

Safari pabandiyon ke tahat 39 mumalik ke shehriyon ke liye talba aur mulazmat ke visas ka husool mukammal tor par rok diya gaya, jabke naye zawabit aur fees ke bais deegar mumalik ke shehriyon ko bhi pehle ki nisbat kam talba aur H-1B work visas jari hue. Bharat aur China par bilawasta safari pabandiyan nahin thin, is ke bawajood un ke shehriyon ke talba aur mulazmat ke visas mein numayan kami hui.

Janubi sarhadi dakhli maqamat par qanooni panah ki darkhaston mein 99.9 fisad kami aayi, jabke panah gazeenon ki America amad mein taqriban 90 fisad kami record ki gayi.

Nayi policyan Congress ki manzoori ke baghair nafiz ki gayin, taham ba’d azan federal adalaton ne in mein se ba’z iqdamat rok diye. August ke ikhtitam par do alag muqadmaat mein adalaton ne hukumat ko dobara visas jari karne ka hukm diya. New York Times ki report ke mutabiq adalati ahkamat ke bawajood mutasira afrad ki badi aksariyat ab bhi visas ke ijra ki muntazir hai.