Albania mein wazir-e-azam ke istefe ka mutalba, paanch roz se hungame, 167 afraad girftar

Tirana: European mulk Albania ke darulhukumat mein wazir-e-azam Edi Rama ke istefe ka mutalba karne wale muzahirin aur police ke darmiyan musalsal panchwen roz bhi shadeed jhadpen hui.

Police ne muzahirin ko muntashir karne ke liye pehli martaba rubber ki goliyan chalayin, jabke water cannon, aansu gas aur mirchon ke spray ka bhi istemal kiya gaya.

Arab TV ke mutabiq mangal se jaari muzahiron mein hazaron afraad shareek hain. Muzahirin universities ki soorat-e-haal aur bhari taleemi feeson par ehtijaj karte hue wazir-e-azam se mustafi hone ka mutalba kar rahe hain.

Jhadpon ki tafseel

Muzahirin ne police par patthar, dhaati ashya, aatish geer botalen aur aatish bazi ke aalaat phenke. Baaz muzahirin ne gaadiyon aur koora danon ko aag laga kar sadkon par rukawatein khadi kar din. Police ki karrawai ke dauran Tirana ki sadkein aansu gas aur dhuen se bhar gayin.

Muzahirin ka arzi tibbi imdad camp chalane wali nojawan khatoon Paula ke mutabiq rubber ki goliyon se sar, aankhon aur tangon par chotein lagne ke shubhe mein teen afraad ko tibbi imdad di gayi.

Albania ke qanoon ke tehat ehtijaji muzahiron mein police rubber ki goliyan sirf intehai halaat mein istemal kar sakti hai.

Wizarat-e-Sehat ke mutabiq jhadpon ke dauran nau muzahirin aur chaar police ahalkaron ko tibbi imdad faraham ki gayi.

Talib-e-ilm Redi Tako ne rubber ki goliyon ke istemal par tashweesh zahir karte hue kaha ke muzahirin mein 16 aur 17 saal ke kam umr nojawan bhi shamil hain.

Police sarbarah ka mauqif

Albania ke police sarbarah Iskander Heta ne press conference mein kaha ke rubber ki goliyan mehdood paimane par istemal ki gayin aur karrawai mein sirf manzoor shuda aalaat istemal kiye gaye.

Un ke mutabiq hafte bhar ke ehtijaj ke dauran 167 afraad ko girftar kiya gaya, jabke 388 afraad ke khilaf faujdari karrawai shuru kar di gayi.

Ikhtiyarat se tajawuz ke ilzamat par saat police ahalkaron ko muattal kar ke un ke khilaf mehkamana tehqiqat bhi shuru ki gayi hain.

Police sarbarah ne mazeed bataya ke paanch roza ehtijaj ke dauran, zyada tar Tirana mein, 132 police ahalkaar zakhmi hue. Unhon ne tashaddud mein maloos afraad se ghair qanooni sargarmiyan fori rokne ka mutalba kiya.

Muzahiron ke aaghaz mein baaz nojawanon ne aik suitcase ko aag laga kar wizarat-e-Taleem ke ahate mein phenka, jise mulk chhorne se inkar ki alamati karrawai qarar diya gaya.