Aik sadi baad cheetay ke naqsh o nigar wali jungli billi ki nayi nau daryaft

Cheetay jaise chitkabre coat wali yeh chhoti jungli billi jise Tilkaiyo Tiger Cat ka naam diya gaya hai, Bolivia ke darul-hukumat La Paz ke qareeb Yungas ke pahari ilake se daryaft hui hai.

Tehqeeqi team mein shamil biologist aur National Geographic ki explorer Paola Nogales Escarrones ke mutabiq Bolivia ke Andes pahari silsile mein muqeem maqami log is makhlooq ko aam gharelu billi samajhne ki ghalti kar baithte the.

Maqami logon ki janib se is janwar ko diye gaye naam Tilkaiyo ki munasibat se hi is ka naya science naam Leopardus tilkaiyo rakha gaya hai.

Paola Nogales ne is daryaft ko aik hairan kun aur ghair mamooli waqia qarar dete hue kaha ke yeh aik shandar pesh raft hai kyunke guzishta 100 saalon mein jungli billi ki koi nayi nau samne nahin aayi thi, yeh 1923 mein daryaft hone wali Uruguayan Pampas Cat ke baad daryaft hone wali pehli nayi jungli billi hai.