Ahsan Iqbal: Mission 100 arab dollar ke tehat aath shobon mein clusters ki bunyad par taraqqi hogi

Islamabad: Wafaqi wazir bara-e-mansooba bandi, taraqqi o khusoosi iqdamaat Professor Ahsan Iqbal ne mulki baramadaat 100 arab dollar tak pahunchane ke liye Mission 100 arab dollar ka laiha-e-amal pesh karte hue kaha hai ke Udaan Pakistan ke tehat aath tarjihi shobon mein clusters ki bunyad par taraqqi aur aalami supply chains se mazboot rawabit qayam karna honge, taake mulk maashi khudmukhtari hasil karte hue apni taraqqi ke liye darkar wasail khud paida kar sake.

Pakistan Institute of Development Economics (PIDE) mein Pakistan Society of Development Economists ki 39wein salana conference se khitab karte hue wafaqi wazir ne kaha ke hamein aisa maashi nizam tashkeel dena hoga jo apni khushhali ke wasail khud paida kare, taraqqi ke liye maali wasail faraham kare aur maashi mustaqbil ke faisle khud karne ki salahiyat rakhta ho.

Baramadaat ka taqabuli jaiza

Unhon ne taqabuli aadad o shumar pesh karte hue bataya ke calendar saal 2024 mein Pakistan ki ashya ki baramadaat taqriban 32.3 arab dollar reh gayin jabke Bangladesh ki baramadaat 47.2 arab dollar, Malaysia ki 330.4 arab dollar aur Vietnam ki 404.8 arab dollar thin. In mein khidmaat ki baramadaat shamil nahin hain.

Ahsan Iqbal ne kaha ke maashi istehkam barqarar rakhte hue paidawari salahiyat aur aalami mandiyon mein musabiqat barhana zaroori hai taake baironi adaigiyon ke musalsal dabao par qaboo paya ja sake. Is maqsad ke liye aise baramadi clusters qayam karna honge jahan paidawari idaron ko maahir suppliers, hunarmand afradi quwwat, jamiaat, tehqiqi laboratories, maali wasail, naql o haml ki sahulaton aur International khareedaron se marboot kiya jaye.

Tarjihi shobe aur CPEC

Unhon ne kaha ke baramadaat barhane ki hikmat-e-amali ke tehat zaraat, sanat o manufacturing, khidmaat, information technology, kaan kani, afradi quwwat o hunarmandi, samandari maeeshat aur takhliqi sanaton par tawajjo di jayegi. Clusters ki mansooba bandi khareedaron ki zarooriyat ko madde nazar rakhte hue ki jani chahiye, aur sarmaya kari, tarbiyat, buniyadi dhanche aur miyar ko aalami mandiyon mein dastiyab mauqe se hum aahang karna hoga.

Wafaqi wazir ne kaha ke aalami supply chains mein shamooliyat se maqami suppliers ki istedad mein izafa, mulki masnooaat ki qadr mein behtri aur rozgar ke naye mauqe paida honge. China Pakistan Economic Corridor (CPEC) ke agle marhale mein buniyadi dhanche aur khusoosi iqtisadi zones ko baramadi paidawar se munsalik karne ke wasee mauqe maujood hain.

Unhon ne PIDE aur conference ke shurka par zor diya ke woh baramadi clusters aur paidawari zanjeeron ki taraqqi ke liye qabil-e-amal mansoobe tayyar karein jin mein tarjihi masnooaat, hadafi mandiyon, paidawari istedad mein kami, zimmedar idaron, akhrajaat aur amal daramad ki muddat ki wazeh nishandehi ki jaye. Unhon ne aisi azadana tehqiq ki ahmiyat par bhi zor diya jo hukumati mufrozon ka jaiza le aur shawahid ki bunyad par policy sazi ko behtar banane mein madad de.

Wafaqi wazir ne kaha ke Mission 100 arab dollar ki kamyabi ka asal paimana sirf baramadaat mein izafa nahin balke is ke nateeje mein Pakistani awam ke miyar-e-zindagi aur rozgar mein aane wali behtri hogi.