SSP Loralai ka Duki mein joint investigation ke silsile mein jaye wuqooa ka muaina

Duki: SSP Loralai ne aik aham muqadme ki joint investigation (JIT) ke silsile mein zila Duki ka daura kiya, jahan unhon ne muqadme ki tafteesh ke mukhtalif pehluon ka jaiza lete hue gawahan ke bayanat qalamband kiye aur jaye wuqooa ka tafseeli muaina kiya.

Joint investigation team (JIT) Deputy Inspector General police Loralai ke ahkamat par tashkeel di gayi hai, jis mein SP Duki aur muqadme ke tafteeshi afsar bhi shamil hain.

Daure ke mauqe par SP Duki ne SSP Loralai ko muqadme ke pas manzar, ab tak hone wali tafteesh aur mukhtalif aham pehluon ke hawale se tafseeli briefing di. Baad azan SSP Loralai ne JIT ke hamrah muqadme se mutaliq tamam gawahan ke bayanat sune aur un ke bayanat ko tafseel se qalamband kiya.

Baad azan SSP Loralai ne SP Duki aur police team ke hamrah jaye wuqooa ka daura kiya, jahan waqiye se mutaliq shawahid aur deegar aham pehluon ka bareek beeni se jaiza liya gaya. Is dauran tafteeshi team ne dastiyab shawahid ka muaina karne ke sath sath mutadid aham shawahid bhi ikatthe kiye.

SSP Loralai ne tafteeshi team ko hidayat ki ke muqadme ki tehqeeqat merit, shaffafiyat aur jadeed tafteeshi taqazon ke mutabiq aage barhai jayen aur tamam shawahid o bayanat ko baqaida record ka hissa banaya jaye taake asal haqaiq tak pahunchne mein madad mil sake.

Tafteeshi aur inquiry karrawai mukammal hone ke baad muqadme se mutaliq tamam record murattab karke aik jamia tehqeeqati report Deputy Inspector General police Loralai ko pesh ki jayegi.

Tasveer: bashukriya DGPR Balochistan