Money laundering ki roktham: Currency Transaction Report ki had par nazar-e-sani ki manzoori

Islamabad: Pakistan mein insidad-e-money laundering aur Dehshatgardi ki maali muaawanat ki roktham ke nizam ko jadeed maali khatraat se hum aahang banane ke liye aham iqdamat par ittefaq kiya gaya hai.

Wafaqi wazir-e-khazana Muhammad Aurangzeb ki zer-e-sadarat insidad-e-money laundering aur counter financing terrorism ki qaumi executive committee ke ijlas mein maali nigrani ke nizam ko mazeed moassar banane, mutaliqa qawaneen mein tarameem aur idarajati salahiyat behtar banane ke umoor ka jaiza liya gaya.

Committee ke faislay

Ijlas ke baad jari elamiye ke mutabiq committee ne Currency Transaction Report ki had mein mojawwaza nazar-e-sani ki manzoori de di. Is iqdam ka maqsad maali len den ki nigrani ke tareeqa-e-kaar ko mojooda khatraat aur zaruriyat ke mutabiq behtar banana hai.

Elamiye mein bataya gaya ke Pakistan Maritime Zones Act ki dafa 28 ko insidad-e-money laundering Act ke schedule one mein shamil karne ki manzoori bhi di gayi. Is ke ilawa Pakistan Virtual Assets Regulatory Authority ko insidad-e-money laundering Act ke schedule four mein shamil karne ki manzoori di gayi, jise maali nigrani aur virtual assets se mutaliq zabita jati framework ke hawale se aham pesh raft qarar diya ja raha hai.

Ijlas mein Financial Monitoring Unit (FMU) ki karkardagi, idarajati istedad aur nigrani ke nizam ko mazeed mazboot banane ke iqdamat par bhi ghor kiya gaya. Committee ne maali jaraaim ki roktham ke liye Artificial Intelligence aur machine learning ke istemal se mutaliq iqdamat ka bhi jaiza liya. In technologies ke zariye mushtabah maali sargarmiyon ki nishandahi aur len den ki nigrani behtar banane ke imkanat zer-e-behas aaye.

Wafaqi wazir-e-khazana Muhammad Aurangzeb ne mutaliqa idaron ke darmiyan mazboot rabita kari, barwaqt follow up aur faislon par moassar amal daraamad ki zaroorat par zor diya. Unhon ne FMU ki salahiyaton ko mazeed mustahkam banane ke liye wazeh road map tayyar karne ki hidayat bhi ki.

Elamiye ke mutabiq ijlas mein is azm ka aada kiya gaya ke Pakistan ka insidad-e-money laundering aur Dehshatgardi ki maali muaawanat ki roktham ka framework badalte huay maali khatraat se hum aahang rakha jaye ga aur mutaliqa idaron ki istedad behtar banane ke iqdamat jari rahenge.