Triangular series: Sri Lanka ne Pakistan ko 8 wicketon se shikast de di

Lahore: Triangular series ke panchwen match mein Sri Lanka ne shandar karkardagi ka muzahira karte hue Pakistan ko 8 wicketon se shikast de di. Lahore mein khele gaye match mein Pakistani team pehle batting karte hue 25.3 overs mein sirf 110 runs par dher ho gayi.

Jawab mein Sri Lanka ne matlooba hadaf 2 wicketon ke nuqsan par 18.1 overs mein hasil kar liya. Pakistan ke batters ibtida hi se mushkilat ka shikar rahe.

Fakhar Zaman 5 aur Muaz Sadaqat 8 runs bana kar out hue, jabke Babar Azam ne 33 gendon par 29 runs bana kar muzahmat ki. Saad Baig 5 aur Salman Agha 9 runs bana sake. Hassan Nawaz ne 31 gendon par 17 runs banaye, taham woh bhi team ko bade score tak na pahuncha sake.

Shadab Khan 2, Arafat Minhas 10 aur Haris Rauf ek run bana kar pavilion laut gaye, jabke captain Shaheen Shah Afridi ne 13 gendon par 15 runs banaye. Naseem Shah 2 runs ke sath not out rahe.

Sri Lanka ki janib se Dilshan Madushanka ne 34 runs de kar 5 khilariyon ko maidan badar kiya, jabke Sahan Arachchige ne 2 khilariyon ko out kiya. Asitha Fernando, Eshan Malinga aur Dunith Wellalage ne ek ek wicket hasil ki.

111 runs ke aasan hadaf ke taaqub mein Sri Lanka ne jarehana andaz apnaya. Ibtidai 2 wicketen girne ke bawajood us ne Pakistani bowlers ko mazeed kamyabi ka mauqa na diya. Kamindu Mendis ne 60 gendon par 62 runs ki naqabil-e-shikast innings khele, jis mein 8 chauke aur 2 chhakke shamil the. Pavan Rathnayake ne 26 gendon par 23 runs bana kar not out rahte hue team ko fatah se hamkinar kiya.

Avishka Fernando ne 17 gendon par 16 aur captain Kusal Mendis ne 6 gendon par 8 runs banaye. Pakistan ki janib se Shaheen Shah Afridi aur Arafat Minhas ne ek ek wicket hasil ki.

Sri Lanka ki kamyabi ke baad England ki team final ki dour se bahar ho gayi.