Ahsan Iqbal: Strait of Hormuz ki bandish se tel ki rasad mutasir, fuel relief scheme ka daira barhane par ghaur

Islamabad: Wafaqi wazir planning o development Ahsan Iqbal ne kaha hai ke khitte mein barhti kashidagi aur Strait of Hormuz ki bandish se aalami satah par tel ki rasad mutasir ho rahi hai, jis se mukhtalif mumalik ki maeeshaton ko mushkilat ka samna hai.

Unhon ne kaha ke hukumat dastiyab wasail ke andar rehte hue awam ko zyada se zyada relief faraham karne ke liye koshan hai. Wazir-e-azam Muhammad Shehbaz Sharif ki fuel relief scheme se lakhon afraad mustafid ho rahe hain.

Mushir wazir-e-azam Rana Sanaullah ne bhi news conference mein kaha ke hukumat aam aadmi ko relief dene ke liye sanjida koshishein kar rahi hai. Un ke mutabiq khitte ki surat-e-haal ke tanazur mein tamam siyasi jamaaton ko Pakistan ki siyasi o askari qiyadat ki koshishon ko taqwiyat deni chahiye.

Committee aur tajaweez

Ahsan Iqbal ne bataya ke awam ko mazeed relief dene ke liye Jamaat-e-Islami ke sath mushawarat jari hai. Donon janib ke arkan par mushtamil committee tashkeel de di gayi hai, jo qabil-e-amal tajaweez ko hatmi shakl degi. Jamaat-e-Islami ke wafd ne awam ko relief faraham karne ke hawale se apni tajaweez hukumat ke samne pesh ki hain.

Unhon ne kaha ke committee bahmi mushawarat se thos tajaweez tayyar karegi, jin ki roshni mein awam ko mazeed relief ke imkanat ka jaiza liya jayega. Unhon ne indiya diya ke wazir-e-azam ki fuel relief scheme ka daira kar barhane par bhi ghaur kiya jayega, taham kisi bhi iqdam ke liye mulki wasail aur maeeshati halat ko madde nazar rakhna hoga.

Un ke mutabiq awam ko relief dene ke liye aisa paedar rasta ikhtiyar karna hoga jo taweel muddat tak barqarar reh sake, taake mojooda mushkilat se nimatne ke sath mulki maeeshat ke istehkam ko bhi yaqeeni banaya ja sake.

Aman aur maeeshati istehkam

Ahsan Iqbal ne kaha ke poori dunya is waqt ek hungami surat-e-haal se guzar rahi hai. Strait of Hormuz ki bandish se tel ki tarseel mutasir ho rahi hai, jis ke asarat aalami tawanai mandiyon par par rahe hain aur mutaddid mumalik mein petroleum masnuaat ki qeematon mein izafa hua hai.

Un ke mutabiq aise ghair-maamooli halat mein surat-e-haal ka muqabla danish mandi, zimmedari aur doorandeshi se karna zaroori hai. Pakistan khitte mein kashidagi ke khatme aur aman ke qiyam ke liye safarti kirdar ada kar raha hai, aur chahta hai ke tanao khatam ho taake tel ki qeematon mein kami ki raah hamwar ho.

Ahsan Iqbal ne kaha ke mojooda halat mein Aman o Aman barqarar rakhna tamam halqon ki mushtarka zimmedari hai. Maeeshati challenges ke paish-e-nazar ehtijaji sargarmiyon aur hungamon ke bajaye qaumi istehkam aur maeeshat ki behtari ke iqdamat ko tarjeeh di jani chahiye. Hungame aur muzahire karne se mulki maeeshat ko mustahkam karne ka maqsad hasil nahin ho sakta.

Unhon ne kaha ke siyasi quwwaton aur mutaliqa halqon ko zimmedari ka muzahira karte hue aisa mahaul farogh dena chahiye jis mein hukumat awami masail ke hal aur maeeshati mushkilat se nimatne par tawajjo de sake.

Rana Sanaullah ne kaha ke Jamaat-e-Islami ki soch bhi yehi hai ke aam aadmi ko relief milna chahiye, aur hukumat is jazbe ki qadr karti hai. Unhon ne dawa kiya ke Pakistan ki siyasi aur askari qiyadat ki koshishon se sehyooni agenda nakam hua hai aur khitte mein aman ke liye Pakistan ki kawishon ko aalami satah par tasleem kiya ja raha hai.

News conference mein donon rehnumaon ne azm ka izhar kiya ke hukumat dastiyab wasail ke mutabiq awam ko relief faraham karegi, Jamaat-e-Islami ki tajaweez par mushawarat aage barhai jayegi, aur khitte mein aman ke liye Pakistan ki safarti koshishein jari rakhi jayengi.