Turkiye ki parliamentary committee ne Makkah mushtarka difai muahide ki manzoori de di

Istanbul: Turkiye ki parliament ki khariji umoor committee ne Saudi Arabia, Pakistan aur Turkiye ke darmiyan Makkah mushtarka difai muahide ki manzoori de di. Bill ko hatmi manzoori ke liye Turk parliament mein pesh kiya jaye ga.

Turk media ke mutabiq hukumat ne kaha ke Turkiye, Saudi Arabia aur Pakistan ka muahida jarhiyat nahin balke difa ke liye hai, aur is ka maqsad kisi teesre mulk ke khilaf karrawai karna nahin hai.

Ilaqai salamti

Turkiye ki parliamentary khariji umoor committee ke sarbarah aur hukmran jamaat Justice and Development Party ke rukn Fuat Oktay ne ijlas se khitab karte hue kaha ke Mashriq-e-Wusta, Russia Ukraine jang aur Qafqaz, Balkan aur shumali Africa mein kashidagi ilaqai salamti par barah-e-rast asar andaz ho rahi hai.

Unhon ne kaha ke Makkah muahida ilaqai malkiyat aur difai salahiyat barhane ki janib aham qadam hai, jis ka maqsad khitte mein aman aur istehkam ko farogh dena hai. Un ke mutabiq muahida kisi mulk ke khilaf ittehad banane ya tausee pasandi ke liye nahin, balke difai taawun aur mushtarka difai salahiyat mazboot karne ke liye hai.