IMF sharait par qanoon sazi: hukumat aur PPP mein ittefaq

Islamabad: Hukumat aur PPP ke darmiyan IMF ki sharait par aham qanoon sazi ke hawale se ittefaq ho gaya hai. Is silsile mein Parliament House mein speaker ke chamber mein muzakrat hue. Aham qanoon sazi se mutalliq bills National Assembly aur Senate ke rawan ijlason mein pesh kiye jayenge.

IMF ki sharait ke tahat qanoon sazi aur mukhtalif qawanin mein mujawwaza tarameem ke maamle par Speaker National Assembly Sardar Ayaz Sadiq ki zer-e-sadarat aham mushawirati ijlas hua, jis mein wafaqi hukumat ke wuzara aur Pakistan PPP ke aham rahnumaon ne shirkat ki.

Ijlas mein maliyati umoor, taxon aur duties mein radd-o-badal, sarkari idaron ki nijkari aur mukhtalif shobon se mutalliq qanoon sazi ki tajawiz ka jaiza liya gaya.

Zaraye ke mutabiq is baat par mushawirat ki gayi ke IMF ki sharait se mutalliq mujawwaza qanooni tarameem aur mukhtalif bills ko National Assembly aur Senate se kis tareeqa-e-kar ke tahat manzoor karaya jaye. Maliyati umoor se mutalliq baaz qawanin mein tabdeeliyon ke sath taxon aur duties mein radd-o-badal se mutalliq sharait bhi zer-e-ghaur aayin.

Zer-e-ghaur qanoon sazi

Zaraye ka kehna hai ke ijlas mein in sarkari idaron se mutalliq qawanin mein tarameem ki tajawiz par bhi ghaur kiya gaya jinhein nijee shobe ke hawale kiya jana hai. Is silsile mein mujawwaza qanoon sazi aur mutalliqa bills ki Parliament ke dono aiwanon se manzoori ke umoor zer-e-bahas aaye.

Ijlas mein Supreme Court ke Mustafa Impex case mein diye gaye faisle ki roshni mein baaz bills ki manzoori ke maamle par bhi mushawirat ki gayi.

Zaraye ke mutabiq petroleum aur ghizai shobon se mutalliq baaz bills bhi pesh kiye jane ka imkan hai, jin ke qanooni aur parliamentary pehluon ka jaiza liya gaya. Zaraye ke mutabiq Pakistan PPP ki janib se aise bills ki mukhalifat na karne ka imkan zahir kiya gaya hai.