Deputy Commissioner Duki ka BSDI ke tarqiyati mansoobon ka muaina, meyar aur barwaqt takmeel par zor

Duki: Deputy Commissioner Fazal ur Rehman Kabdani ne Balochistan Structural Development Initiative (BSDI) program ke tehat jari mukhtalif tarqiyati mansoobon ka tafseeli daura kiya aur mansoobon par jari tameerati kaam, pesh raft, raftar aur meyar ka moqe par jaiza liya.

Mansoobon ka muaina

Deputy Commissioner ne Government Degree College Duki, Khatm-e-Nabuwat Chowk, Taxi Stand, Thal Looni Transport Adda samet District Headquarter Hospital Duki mein zer-e-tameer zacha o bacha markaz ka muaina kiya. Is moqe par mutalliqa hukkam aur tameerati amle ne Deputy Commissioner ko mukhtalif mansoobon par jari kaam ki pesh raft, tameerati marahil aur aainda ke laiha-e-amal ke hawale se briefing di.

Deputy Commissioner Fazal ur Rehman Kabdani ne mansoobon ke tameerati kaam ka bareek beeni se jaiza lete hue kaha ke tarqiyati mansoobon ki barwaqt aur miyari takmeel zilai intizamiya ki awwaleen tarjihat mein shamil hai. Unhon ne mutalliqa afsaran aur contractors ko hidayat ki ke tamam mansoobon mein tameerati meyar, manzoor shuda design, muqarrara specs aur sarkari zawabit par har surat amal daramad yaqeeni banaya jaye.

Takheer aur meyar par samjhota nahin

Unhon ne kaha ke tarqiyati mansoobon mein ghair zaroori takheer kisi surat bardasht nahin ki jaye gi, is liye kaam ki raftar ko mazeed tez karte hue muqarrara muddat ke andar mansoobon ki takmeel yaqeeni banai jaye. Unhon ne tameerati kaam mein istemal hone wale material ke meyar par bhi khusoosi tawajjuh dene ki hidayat ki.

Deputy Commissioner ne mazeed kaha ke BSDI program ke tehat jari mansoobon ki takmeel se Duki ke awam ko taleem, sehat, transport aur deegar bunyadi shehri sahuliyat ki faraahmi mein numayan behtari aaye gi. Unhon ne mutalliqa hukkam ko hidayat ki ke mansoobon ki musalsal nigrani ki jaye aur kaam ke meyar par kisi qism ka samjhota na kiya jaye.

Is moqe par mutalliqa mehkamon ke afsaran aur tameerati amla bhi mojood tha.

Tasveer: Bashukriya DG PR Balochistan