Chief Minister Balochistan Intra School Hockey Tournament ka Ayub Stadium mein iftetah

Quetta: Chief Minister Balochistan Intra School Hockey Tournament ki iftetahi taqreeb Ayub Stadium mein munaqid hui. Taqreeb ke mehman-e-khusoosi Parliamentary Secretary baraye Transport Mir Liaquat Lehri the.

Taqreeb mein Pakistan Hockey Association Balochistan ke General Secretary Saeed Amin, Moawin-e-Khusoosi baraye Dakhila Babar Yousafzai, Deputy Commissioner Quetta, EDO Taleem Quetta aur deegar afsaran bhi maujood the.

Khitab mein Mir Liaquat Lehri ne nojawanon ke liye khelon ki ahmiyat ujagar karte hue kaha ke khelon ke farogh se nojawanon ko musbat sargarmiyon ki janib raghib karne, un ki salahiyaton ko nikharne aur qaumi satah par talent samne lane ke mawaqe mayassar aayenge. Unhon ne kaha ke Chief Minister Balochistan ki dili khwahish hai ke nojawanon ko khelon ki janib raghib karne ke liye zyada se zyada mawaqe faraham kiye jayen. Is mauqe par khilariyon ka taruf hasil kiya gaya aur un ki hausla afzai ki gayi.

Unhon ne Hockey Association ki kawishon ko sarahte hue kaha ke nojawanon ko khelon ke behtar mawaqe faraham karne aur Hockey samet deegar khelon ke farogh ke liye iqdamat ki hausla afzai ki jayegi.

Unhon ne kaha ke taleemi idaron mein khelon ke muqable nojawan nasl mein nazm-o-zabt, team work aur musbat soch ko farogh dene mein aham kirdar ada karte hain. Aise tournaments ka tasalsul barqarar rakha jana chahiye taake schoolon keba-salahiyat khilariyon ko apni salahiyaton ke izhar ke mazeed mawaqe mil saken.

Deputy Commissioner Quetta Mehrullah Badini ne bhi khilariyon se mulaqat ki aur un ki hausla afzai ki. Unhon ne Hockey Association ki koshishon ko sarahte hue kaha ke zila intezamia khelon ke farogh aur nojawanon ko musbat sargarmiyon ke mawaqe faraham karne ke liye har mumkin taawun jari rakhegi.