Khuzdar: Mir Younus Aziz Zehri ki sarbarahi mein mehkamon ka mahana jaiza ijlas

Khuzdar: DC Office Khuzdar ke conference hall mein zila Khuzdar ke tamam mehkamon ka mahana jaiza ijlas opposition leader Balochistan Assembly Mir Younus Aziz Zehri ki sarbarahi mein munaqid hua. Ijlas mein Deputy Commissioner Khuzdar Abdul Razzaq Sasoli ne khusoosi taur par shirkat ki.

Ijlas ka aghaz tilawat-e-kalam-e-pak se hua, jis ke baad tamam mehkamon ne bari bari apni mahana karkardagi report pesh ki.

Mehkamon ki briefing

Mehkama Sehat ne hospitalon mein adviyat ki faraahmi, mehkama Taleem ne schoolon mein asatiza ki hazri, jabke mehkama B&R, Public Health Engineering aur Urban Planning ne jari taraqqiati schemon, sarkon aur water supply schemon par tafseeli briefing di. Is ke alawa mehkama haiwanat, Zaraat aur deegar mehkamon ke officers ne bhi apne mehkamon ke bare mein briefing di.

Hidayat

Ijlas ki sadarat karte hue Mir Younus Aziz Zehri ne tamam mehkamon ki karkardagi ka tafseeli jaiza liya aur kaha ke awam ki falah-o-behbood ke liye jari taraqqiati projects kisi par ehsan nahin balke awam ka haq hain. Unhon ne kaha ke Khuzdar ek pasmanda zila hai, yahan ke awam ko Taleem, Sehat, pani aur sarkon jaisi bunyadi sahuliyat ki faraahmi mein koi samjhota nahin kiya jaye ga.

Unhon ne wazeh hidayat ki ke tamam taraqqiati projects ko waqt par aur miyari andaz mein mukammal kiya jaye aur har project mein shaffafiyat ko yaqeeni banaya jaye taake awam ko behtar aur derpa sahuliyat muyassar aa saken.

Mir Younus Aziz Zehri ne mazeed kaha ke tamam mehkamon ke officers apne daftaron mein awam ke liye aasani paida karen, awami masail ke hal mein kotahi na barten aur apni zimmedariyan ahsan, imandari aur farz shanasi ke sath nibhaen. Unhon ne kaha ke tamam mehkame apni mahana karkardagi report tayyar rakhen aur woh khud un ke daftaron mein jaen ge, taake jin mehkamon ki karkardagi kharab hai un ki nishandehi ho sake.

Deputy Commissioner Khuzdar Abdul Razzaq Sasoli ne kaha ke opposition leader Mir Younus Aziz Zehri ki hidayat par sau fisad amal daramad kiya jaye ga aur awam ko relief dene ke liye zila intizamiya har mumkin iqdamat kare gi.

Tasveer: Bashukriya DG PR Balochistan