Pensioners ke liye proof of life certificate ka jadeed nizam mutaarif

Wafaqi hukumat ne pensioners ke liye proof of life ka jadeed nizam mutaarif kara diya, jis ke liye biometric aur chehre ki tasdeeq ke liye sahulat muft hogi.

Tarjuman NADRA ke mutabiq pensioners ab ghar baithe Pak ID se certificate hasil kar sakte hain, mobile app istemal na karne wale pensioner ke khandan ka koi fard certificate banwa sakta hai, proof of life ki muft sahulat 5 hazar e-Sahulat franchises par bhi dastiyab hai.

Bayan ke mutabiq 988 NADRA markaz aur 500 union councils se bhi certificate muft banwaya ja sakta hai, NADRA markaz aur union councils mein pensioners ko tarjihi buniyad par khidmat faraham ki jayengi, NADRA ne CGA aur MAG ke pensioners ke liye National Pensioners Register qaim kar diya, yeh register pensioner ki shanakht aur proof of life status ki digital tasdeeq ka mustanad zariya hai.

Tarjuman NADRA ke mutabiq pensioner ki wafat Death Notification Tool ya CRMS mein darj hone par pension controller ko ittila mil jayegi, sanvi ya family pensioners ki umar ya azdawaji haisiyat mein tabdeeli ki bhi ittila di jayegi.

Bayan ke mutabiq pension jari rakhne, tabdeel karne ya band karne ka faisla muta’alliqa mujaz pension authority karegi, mujaz bank National Pensioners Register se pensioner ka proof of life status barah-e-raast check kar sakenge, digital tasdeeq se pension ke liye baar baar zaati hazri aur kaghazi tasdeeq ki zaroorat kam hogi, deegar sarkari aur nijji idaron ke pensioners ko bhi National Pensioners Register mein shamil kiya jayega.