IMF ki pesh goi: khitte ki maeeshat is saal 1.3 feesad sikdegi, 2027 mein 6.6 feesad numo
Dubai: International Monetary Fund (IMF) ne jumeraat ko jari apne ilaqai iqtisadi jaize mein pesh goi ki hai ke Middle East, shumali Africa aur Pakistan ki majmooi paidawar is saal 1.3 feesad sikdegi. Idare ke mutabiq is ki wajah America aur Israel ki qayadat mein Iran ke khilaf jang hai.
IMF ne kaha ke jang se tawanai ki paidawar, jahaz rani, siyahat, tijarat aur aitemad mutasir hue hain. 2027 mein paidawar mein 6.6 feesad izafa mutawaqqe hai, taham in maeeshaton ki paidawar umooman jang se pehle ke andazon se kam rahegi.
Idare ke mutabiq jang ka asar numaya magar ghair yaksan raha. Tel bar amad karne wale mumalik, jahan tawanai ki paidawar aur jahaz rani mein khalal pada, zyada mutasir hue, jabke tel dar amad karne wali maeeshatein nisbatan mazboot rahin. In ki dakhli talab ko tarseelat-e-zar, siyahati amdan, sazgar maali halat aur sarifeen ko ajnas ki buland qeematon se bachane wale barwaqt iqdamat ne sahara diya.
IMF ka bunyadi andaza hai ke tanaza 2027 ke aghaz mein kam ho jaye ga aur isi saal tijarat batadreej mamool par aaye gi. Taham us ne kaha ke manzar nama badastoor ''ghair mamooli tor par buland ghair yaqeeni'' ki lapet mein hai.
Idare ne bataya ke bare khatraat tawanai ki paidawar aur tijarati raston mein mazeed rukawat hain, jo tawanai ki qeematein barha sakti hai. Agar sarmaya kar Artificial Intelligence se paidawari fawaid ka az sar-e-nau jaiza lein aur Mehngai o maali surat-e-haal ke khadshat mein sharah-e-sood mazeed barhe to beruni maali halat bhi sakht ho sakte hain.
Qafqaz aur wasti Asia ke liye IMF ne 2026 mein 5.2 feesad aur 2027 mein 5 feesad numo ki pesh goi ki hai. Idare ne guzishta hafte ke salana ijlason wala paigham dohrate hue policy sazon par zor diya ke woh qeematon mein istehkam, maali paidari aur markazi bank ki azadi ko tarjeeh dein aur paidawariat barhane o rozgar paida karne ke liye sakhtari islahat karen.
Haftawar Mehngai mein 0.65 fisad izafa, salana sharah 11.85 fisad ho gayi
Pakistan ki bairooni maliyati position kamzor hone ka khadsha, IMF ki tanbeeh
PSX mein mandi, KSE-100 index 1,550 points gir kar 162,375 par band
Russia par pabandiyon mein narmi ke baad tel sasta, Brent 107 dollar ke qareeb
Lahore mein naan ki qeemat 5 rupay barh kar 35 rupay ho gayi, roti 20 rupay par barqarar
Khaleeji kashidagi ke paish-e-nazar monetary policy mein sharah-e-sood na barhai jaye: Faisal Moiz Khan
State Bank ki monetary policy committee ka ijlas 26 October ko, sharh-e-sood mein izafe ka imkan
Karachi mein 20 kilo aate ka thaila 3540 rupay ka, mulk bhar mein sab se mehnga
Petrol 88 paise aur High Speed Diesel 53 paise fi litre mehnga, nayi qeematein 21 October se nafiz
Mausam sarma mein gas ki talab poori karne ke liye hukumat ka darameedi LNG ke 18 cargoes khareedne ka faisla
Interbank mein dollar mazeed 3 paisay sasta, 276 rupay 87 paisay par band
