Pakistan mein digital len den karne walon ki tadad 20 lakh se tajawuz kar gayi

Wazir-e-mamlikat bara-e-khazana Bilal Azhar Kayani ne Gates Foundation ke aala satah wafd se mulaqat ki, Gates Foundation ke wafd ki qiyadat sinfi musawat division ki sadr Dr Anita Zaidi ne ki.

Mulaqat mein digital tabdeeli, maashi islahat aur cashless economy par pesh raft ka jaiza liya gaya, Gates Foundation ne hukumati islahati iqdamat ki tareef ki.

Gates Foundation ke mutabiq cashless Pakistan aur maashi islahati agenda ki himayat jari rakhenge, Karandaz ke zariye Pakistan mein taawun mazeed barhane ka yaqeen dilaya.

Wazir-e-mamlikat khazana Bilal Azhar Kayani ne kaha ke digital len den karne walon ki tadad 5 lakh se barh kar 20 lakh se zaid ho gayi, June 2026 tak digital len den ka muqarara hadaf hasil kar liya gaya, digital len den karne walon ki tadad mein mazeed izafe ka hadaf bhi poora karenge.

Un ka kehna tha ke Raast QR ke farogh ke liye hukumat ne sarhe 3 arab rupay ki subsidy di, Raast QR se digital adaigiyon ke nizam ke istemal mein numayan izafa hua, maeeshat ki documentation aur maaliyati shamooliyat ke liye islahat tezi se jari hain, sarkari adaigiyon mein shaffafiyat aur karkardagi barhane ke liye hukumati islahat jari hain.