America ka Greenland par mustaqil security control, muahida tay pa gaya: Trump ka dawa

Sadr Trump ke mutabiq muahide ke tahat America Greenland ke difa aur security ke liye zaroori iqdamat kar sakega jabke American mukhalif mumalik ko Greenland mein fauji adde qayam karne, fauji maujoodgi rakhne ya hassas nauiyat ki sarmayakari karne se roka jaye ga, America Greenland mein apni fauji maujoodgi bhi barhane ka mansooba rakhta hai.

Denmark ke wazir-e-azam Mette Frederiksen ke daftar ke mutabiq teenon fareeq aainda hafte New York mein United Nations ki General Assembly ke ijlas ke moqe par muahide par dastakhat karenge, taham iske nifaz se qabl zaroori parliamentary karrawai mukammal karna hogi.

Frederiksen ne kaha ke muahida Arctic aur shimali Atlantic ke khitte mein mushtarka security ko mazboot karega aur Denmark o Greenland ki khudmukhtari aur ilaqai salamati ko tasleem karta hai.

American khabar rasan idare Associated Press ke mutabiq muahida Greenland ki khudmukhtari Denmark ke paas barqarar rakhte hue American fauji maujoodgi mein izafe ki raah hamwar karta hai.

Greenland mein pehle hi America ka Pituffik Space Base maujood hai, jo missile warning, difa aur khalai nigrani ke liye aham samjha jata hai