Afghanistan mein Daesh Khorasan ab bhi sangeen security khatra hai: Russia ka intabah

Aqwam-e-muttahida ki Security Council ke ijlas se khitab karte hue Aqwam-e-muttahida mein Russia ke mustaqil numainde Vassily Nebenzia ne kaha ke Afghanistan aur Africa ke baaz ilaqon mein dehshatgardi ka khatra badastoor mojood hai.

Yeh ijlas 11 September 2001 ke dehshatgard hamlon ki 25 veen barsi ke hawale se munaqid kiya gaya.

Russi mandoob ne kaha ke mukhtalif khitton ke darmiyan ghair mulki dehshatgard jangjuon ki naql-o-harkat aur ek ilaqe mein hasil hone wale jangi tajurbe ko doosre ilaqon tak muntaqil karne ka challenge ab bhi hal nahin kiya ja saka.

Vassily Nebenzia ne dehshatgard giroohon ke tareeqa-e-kaar mein aane wali tabdeeliyon par bhi tawajjo dilayi, dehshatgard tanzeemein bharti, propaganda, maali moaawnat aur hamlon ki mansooba bandi o rabita kari ke liye nayi technology, digital maaliyati zaraye, drones, Artificial Intelligence aur jadeed muwasalati networks ka barhta hua istemal kar rahi hain.

Unhon ne in khatraat ko sarhadon se mawara qarar dete hue dehshatgardi ke khilaf aalami satah par murabbat taawun ki zaroorat par zor diya.

Russi mandoob ne kaha ke Daesh Khorasan ne guzishta barson ke dauran Afghanistan mein kai muhlik hamle kiye hain aur Afghanistan se bahar bhi karrawaiyan karne ki salahiyat ka muzahira kiya hai.