Usta Muhammad: Mehnga aata farokht karne wale dukandaron par bhari jurmane, do aata shops seal

Usta Muhammad: Deputy Commissioner Usta Muhammad Muhammad Ramzan Palal ki khusoosi hidayat par Assistant Commissioner Muhammad Ramzan Ishtiaq ne shehr ke mukhtalif ilaqon mein aate ki qeematon aur sarkari nirkhon par farokht ka jaiza lene ke liye achanak moayena kiya aur dukanon o aata shops par aate ki dastiyabi, miyar aur nirkhon ki jaanch partaal ki.

Moayene ke dauran sarkari nirkhon ki khilaf warzi karte hue aata mehnge daamon farokht karne wale mutaddid dukandaron par bhari jurmane aid kiye gaye aur do aata shops seal kar di gayin. Assistant Commissioner ne dukandaron ko hidayat ki ke aata aur deegar ashya-e-zaruriya sarkari nirkh nameh ke mutabiq farokht karen; masnooi Mehngai ya najaiz munafa khori ki ijazat nahin di jaye gi aur khilaf warzi par bila imtiaz karrawai jari rahe gi.

Yeh karrawai usi roz munaqida Khuli Kachehri mein shehriyon ki janib se mehnge aate ki mutaddid shikayat ke baad Deputy Commissioner ki hidayat par amal mein layi gayi. Deputy Commissioner Muhammad Ramzan Palal ne kaha ke awam ko sarkari nirkhon par ashya-e-zaruriya ki faraham-i zilai intizamiya ki awwaleen tarjeeh hai aur afsaran bazaron mein qeematon ki baqaidah nigrani karen taake shehriyon ko giraan farooshi se tahaffuz mile.

Tasveer: Bashukriya DGPR Balochistan