Wazir-e-aala: Koh-e-Sulaiman Division ki tamam divisional postoun ki manzoori

Shumali Dera Bugti: Chief Minister Balochistan Mir Sarfraz Bugti ne kaha hai ke Koh-e-Sulaiman Division ki tamam divisional postoun ki manzoori de di gayi hai aur un par officers o amle ki taynati bohat jald amal mein layi jaye gi.

Chhote intizami units ki zaroorat

Balochistan mein awam ko un ki dehleez par sarkari khidmat ki faraahmi yaqeeni banane ke liye chhote intizami units ka qiyam nagzeer hai. Soobe mein naye soobon ke saath chhote divisions aur Azla banane ki bhi zaroorat hai takay civil hukumat aur sarkari mahkamon tak awam ki rasai aasan banai ja sake.

In khayalat ka izhar unhon ne Shumali Dera Bugti mein press conference karte hue kiya.

Wazir-e-aala ne kaha ke mulk mein chhote intizami units ke qiyam par bahas ab shuru hui hai, jabke unhon ne Balochistan ke makhsoos halaat aur awami zarooriyat ko madde nazar rakhte hue is amal par do saal qabl hi kaam shuru kar diya tha.

Un ka kehna tha ke intizami dhanche ko is andaaz mein tashkeel dena zaroori hai ke riyasti idaron aur civil hukumat ki maujoodgi awam ke qareeb ho aur logon ko sarkari umoor ke silsile mein mushkilat ka saamna na karna pare.

Rakhni Division ki taraqqi

Wazir-e-aala Mir Sarfraz Bugti ne kaha ke Rakhni headquarters ko Balochistan ka misali division banane aur taraqqi ke maidan mein namayan maqam dilane ke liye iqdamat jari hain.

Unhon ne kaha ke Rakhni headquarters ko division ka darja bohat pehle mil jana chahiye tha, taham ab taraqqiyati amal ka aghaz ho chuka hai.

Unhon ne wazeh kiya ke Rakhni mein taraqqiyati kamon ko badunwani ke mafia aur commission ki lanat se paak rakhne ke liye sakht hidayat jari ki gayi hain, jabke Communication and Works Department khud taraqqiyati mansoobon par amal daramad kar raha hai takay shaffafiyat ko yaqeeni banaya ja sake.

Wazir-e-aala ne kaha ke hukumat ki koshish hai ke Rakhni ko aik aisa misali division headquarters banaya jaye jahan taraqqiyati mansoobe shaffaf andaaz mein mukammal hon aur awam ko un ke samraat hasil hon.

Gwadar mein Dehshatgardi ke waqiye ka zikr karte hue Chief Minister Balochistan ne taameerati company ki imarat ko nishana banane ki koshish nakam banane par security forces ki barwaqt karwai ko saraha.

Unhon ne kaha ke Balochistan mein Dehshatgardi ke khilaf Pak fauj, Frontier Corps aur police ki qurbaniyan aur karwaiyan qabil-e-tehseen hain. Un ka kehna tha ke August ke baad soobe mein Dehshatgardi ke waqiat ke rujhan mein kami aana aik musbat pesh raft hai, jo security forces ki musalsal koshishon ka nateeja hai.

Wazir-e-aala ne kaha ke Dehshatgardi ke nasoor ke khilaf karwaiyan jari rehni chahiyen aur dua ki ke Allah Taala Balochistan se Dehshatgardi ka hamesha ke liye khatma farmaye.

Tasveer: Bashukriya DG PR Balochistan