Sarfraz Bugti ka 21ween National Workshop se khitab: Balochistan mein insurgency nahin, alehdgi ki soch phailai ja rahi hai

Quetta: Chief Minister Balochistan Mir Sarfraz Bugti ne kaha hai ke Balochistan mein insurgency nahin balke chand anasir shanakht ki bunyad par alehdgi ki soch ko farogh de rahe hain. Aise anasir Pakistan ko cake ki tarah taqseem karna chahte hain, taham Pakistan ko torne ki koi sazish kamyab nahin hogi.

Woh Quetta mein 21ween National Workshop Balochistan ke shurka se khitab kar rahe the. Is mauqe par rukn aiwan-e-bala Senator Dinesh Kumar, moawin baraye itelaat o siyasi umoor Shahid Rind aur principal secretary Imran Zarkoon bhi mojood the.

Chief Minister ne kaha ke Baloch naujawanon ko aik lahasil jang ki taraf dhakela ja raha hai jis se na Balochistan ke naujawanon ko kuch hasil hoga aur na hi soobe ke mustaqbil ko koi faida pahunchega. Un ka kahna tha ke ghair mutawazin taraqqi aur pasmandagi ko Balochistan mein be-amni ki markazi wajah qarar dena durust nahin, kyunke ghair mutawazin taraqqi ka masla Pakistan samet duniya ke beshtar mumalik mein mojood hai, taham taraqqi ke liye kahin bandooq nahin uthai jati aur na hi kahin nahaq khoon bahaya jata hai.

Unhon ne naujawanon par zor diya ke woh haqaiq aur tasawwur mein farq ko samjhein aur apne soobe ki durust tareekh se agahi hasil karein. Un ka kahna tha ke beroon-e-mulk baithe Pakistan mukhalif anasir munazzam propaganda ke zariye naujawanon ko gumrah kar rahe hain, is liye naujawan taleem, taraqqi aur roshan mustaqbil par tawajjoh dein aur riyasat mukhalif propaganda ka hissa na banein.

Merit, AI testing aur ehtesab

Chief Minister ne kaha ke riyasat aur naujawanon ke darmiyan khaleej kam karne ke liye naujawanon ko har satah par suna ja raha hai aur meritocracy ko farogh de kar hi naujawanon ko un ka jaiz haq diya ja sakta hai. Balochistan mein artificial intelligence par mabni testing system mutaruf karaya gaya hai taake mulazmaton ke amal mein merit aur shafafiyat yaqeeni banai ja sake. Koi haqdar apne haq se mehroom nahin rahega aur mulazmat sirf merit par di jayegi.

Mir Sarfraz Bugti ne bataya ke guzishta do saal ke dauran Balochistan mein public sector development programme par sau feesad pesh raft hui hai. Anti-corruption department ko faal kar diya gaya hai jabke Chief Minister Inspection Team bhi poori tarah mutaharrik hai, jis ne taraqqiati programmes ke moainay ka aghaz un ke apne halqay se kiya taake wazeh paigham diya ja sake ke ehtesab ka amal bila-imtiaz hoga.

Unhon ne kaha ke corrupt anasir ke khilaf karrawai jari hai aur giriftariyan bhi amal mein aa rahi hain, jabke taraqqiati mansoobon ki nigrani, shafafiyat aur merit yaqeeni banane ke liye idaron ko faal kiya ja raha hai. Soobe mein achhi tarz-e-hukmarani ki bunyad rakh di gayi hai aur is ka tasalsul barqarar rakha jayega. Hukumat ka maqsad aisa nizam qaim karna hai jis mein merit, shafafiyat, jawabdehi aur naujawanon ke liye mauqe yaqeeni hon.

Baad azan Chief Minister ne Balochistan samet mulk bhar se aaye shurka ke sawalat ke jawab diye aur behtareen karkardagi dikhane wali talibat ki hausla afzai ke liye unhein laptop bhi diye. Dhai ghante se zaid jari rehne wale sawal o jawab ke session mein Mir Sarfraz Bugti ne Balochistan ke tareekhi haqaiq, soobe ki mojooda surat-e-haal, hukumati iqdamat aur governance samet mukhtalif mauzuat par tafseeli guftagu ki.

Tasveer: Bashukriya DGPR Balochistan