Quetta samet Balochistan mein namaz-e-jumma par security sakht, imam bargahon ke bahar forces tainat, double sawari par pabandi

Quetta: Soobai darul hukumat Quetta ke mukhtalif ilaqon mein kisi bhi nakhushgawar waqiye se nimatne ke liye namaz-e-jumma ke dauran sakht hifazati intizamat kiye gaye.

Masajid aur imam bargahon ke andar aur bahar forces ko tainat kiya gaya aur andar jane walon ki sakht talashi li gayi. Mushkook afrad par kari nazar rakhi gayi.

Bazar ke aham chowkon aur hassas muqamat par bhi forces tainat rahin, jabke Quetta aane wali gadiyon ki talashi bhi sakht kar di gayi. Double sawari par pabandi aid ki gayi.

Ulama-e-kiram ki dua aur khutbat

Namaz-e-jumma ke dauran ulama-e-kiram ne mulki istehkam, Dehshatgardi ke khatme aur ummat-e-muslima ki kamyabi ke liye ijtimai dua ki.

Khutbon mein awam par zor diya gaya ke woh aapas ke ikhtilafat khatam kar ke un shaitani quwwaton ke khilaf muttahid ho jayen jo mulk ko kamzor karna chahti hain.

Ulama ne kaha ke Islam wahid mazhab hai jo insaniyat ka dars deta hai. Jo log Islam ke naam par Dehshatgardi karte hain un ka Islam se koi talluq nahin, balke woh insan kehlane ke bhi layaq nahin.

Unhon ne kaha ke yeh mulk Islam ke naam par azad hua, Allah Taala khud is ki hifazat karega, lekin hamara bhi farz hai ke zati mufadat ke sath mulki mufadat ka bhi khayal rakhen.